ആര്യയ്ക്ക് സാന്ത്വനമായി സര്‍ക്കാര്‍; ചികിത്സ ചെലവ് ഏറ്റെടുക്കുമെന്ന് മന്ത്രി ശൈലജ ടീച്ചര്‍

കട്ടിലില്‍ ഇരുന്ന് ‘വേദനിക്കുന്നമ്മേ…’എന്ന് ഉറക്കെ കരയുന്ന ആര്യ എന്ന പെണ്‍കുട്ടിയെ നമ്മളെല്ലാവരും കണ്ണീരോടെ ഓര്‍ക്കുന്നുണ്ടാകും. കളിച്ച് നടക്കേണ്ട പ്രായത്തില്‍ ആര്യ രോഗത്തിന് അടിമപ്പെട്ടു. കണ്ണൂരുകാരിയായ ആര്യയ്ക്ക് പതിമൂന്ന് വയസ്സാണ്. ഒരു വര്‍ഷം മുന്‍പാണ് ആര്യ സ്‌കൂളില്‍ തലചുറ്റി വീഴുന്നത്. രക്താര്‍ബുദമാണെന്ന് സ്ഥിരീകരിച്ചതോടെ തിരുവന്തപുരം ആര്‍സിസിയിലേക്ക് ചികിത്സ മാറ്റി. അര്‍ബുദ ചികിത്സക്കിടെയാണ് ആര്യയെ തേടി പുതിയ രോഗമെത്തിയത്. ദേഹം പൊട്ടി മുറിവുകള്‍ ഉണ്ടാകുന്ന തരം അപൂര്‍വയിനം രോഗമാണ് ആര്യയെ പിടികൂടിയത്. കടക്കെണിയിലായതോടെ കുടുംബത്തിന് ചികിത്സകള്‍ നടത്താന്‍ കഴിയാതെ വന്നു.
ഇപ്പോള്‍ ആര്യയുടെ ചികിത്സ ചെലവുകള്‍ ഏറ്റെടുക്കാന്‍ സംസ്ഥാന സര്‍ക്കാര്‍ മുന്നോട്ട് വന്നിരിക്കുകയാണ്. ആര്യയുടെ ചികിത്സ സര്‍ക്കാര്‍ ഏറ്റെടുക്കുമെന്ന് മന്ത്രി കെ.കെ ശൈലജ ടീച്ചര്‍ ഉറപ്പ് നല്‍കി. കണ്ണൂരിലെ വാടക വീട്ടിലാണ് ആര്യയുടെ കുടുംബം ഇപ്പോള്‍ താമസിക്കുന്നത്.