റംസാൻ വെടിനിർത്തൽ പ്രഖ്യാപനത്തിനു തൊട്ടു പിന്നാലെ ഷോപ്പിയാനിൽ ഏറ്റുമുട്ടൽ

റംസാൻ മാസത്തിൽ ജമ്മു കശ്മീരിൽ സൈനിക നടപടിയുണ്ടാകരുതെന്ന് സുരക്ഷാ സൈന്യത്തിന് കേന്ദ്ര നിർദ്ദേശം ലഭിച്ച് മണിക്കൂറുകൾക്കുള്ളിൽ ഷോപ്പിയാനിൽ ഏറ്റുമുട്ടൽ. ഷോപ്പിയാൻ ജില്ലയിലെ ജമ്‌നാഗിരിയിൽ പെട്രോളിംഗ് നടത്തുകയായിരുന്ന സൈനികർക്ക് നേരെ ഭീകരർ വെടിയുതിർക്കുകയായിരുന്നു. ഉടൻ തന്നെ സൈനികർ ശക്തമായ തിരിച്ചടി നൽകി. സംഭവത്തിൽ ആളപായമുണ്ടായതായി റിപ്പോർട്ടില്ല.

നേരത്തെ, പുൽവാമ ജില്ലയിലെ ത്രാളിൽ കാട്ടിനുള്ളിൽ ഭീകരർ ഒളിച്ചിരിക്കുന്നുവെന്ന മുന്നറിയിപ്പിനെ തുടർന്ന് പ്രദേശത്ത് സൈന്യം തിരച്ചിൽ നടത്തിയിരുന്നു. ഇതിനിടയിൽ ഭീകരരും സൈനികരും പരസ്പരം ഏറ്റുമുട്ടുകയും ചെയ്തു. പുണ്യമാസത്തിൽ സൈനിക നടപടി ഒഴിവാക്കി കേന്ദ്രസർക്കാർ ഉത്തരവിന് പിന്നാലെയാണ് ആക്രമണമുണ്ടായത്.