നിസാന്‍ ഡിജിറ്റല്‍ ഹബ് കേരളത്തിലേക്ക്

കേരളത്തില്‍ ചുവടുറപ്പിക്കാന്‍ ബഹുരാഷ്ട്ര കമ്പനികള്‍ മടിച്ചു നില്‍ക്കുന്ന അവസരത്തില്‍ ശുഭവാര്‍ത്തയുമായി മുഖ്യമന്ത്രി. ആഗോള ഓട്ടോമൊബൈല്‍ ബ്രാന്‍ഡ് ആയ നിസാന്റെ ഗവേഷണ വികസന ഹബ് സംസ്ഥാനത്തില്‍ ആരംഭിക്കുന്നെന്ന വാര്‍ത്തയാണ് മുഖ്യമന്ത്രി തന്റെ ഫേസ്ബുക്ക് പോസ്റ്റിലൂടെ പങ്കുവച്ചിരിക്കുന്നത്. ഇതിനായി സ്ഥലം അനുവദിച്ചിട്ടുണ്ട്. ടെക്‌നോസിറ്റിയിലാണ് സ്ഥലം നല്‍കിയിരിക്കുന്നത്. ആദ്യഘട്ടത്തില്‍ 30 ഏക്കറും,രണ്ടാം ഘട്ടത്തില്‍ 40 ഏക്കറും കൈമാറും.

കഴിഞ്ഞ മന്ത്രിസഭായോഗത്തില്‍ നിസാന് നല്‍കിയ അനുമതിയുടെ നടപടിക്രമങ്ങള്‍ വേഗത്തിലാക്കുകയായിരുന്നു. ഗവേഷണവും സാങ്കേതിക വികസനവുമാണ് ഹബ്ബില്‍ നടക്കുക. ഇലക്ട്രിക്-ഓട്ടോമേറ്റഡ് വാഹനങ്ങള്‍ക്കാണ് പരിഗണന. നിസാന്റെ വരവ് സംസ്ഥാനത്തെ ഐടി അധിഷ്ഠിത വ്യവസായ വളര്‍ച്ചക്ക് കാരണമാകുമെന്നാണ് വിലയിരുത്തല്‍. മറ്റ് വാഹന നിര്‍മ്മാതാക്കളും സംസ്ഥാനത്തെ വ്യവസായ സൗഹൃദമായിക്കരുതാന്‍ ഇത് തുടക്കമായേക്കും.

മുഖ്യമന്ത്രിയുടെ ഫേസ്ബുക്ക് പോസ്റ്റ്‌:

ആഗോളവാഹനനിര്‍മ്മാതാക്കളായ നിസാന്റെ ആദ്യഗ്ലോബല്‍ഡിജിറ്റല്‍ ഹബ്ബ് കേരളത്തില്‍ സ്ഥാപിക്കുന്നു. നിസാന്‍ ഡിജിറ്റല്‍ ഹബ്ബ് സ്ഥാപിക്കാന്‍ സ്ഥലം അനുവദിച്ച് സര്‍ക്കാര്‍ ഉത്തരവിറക്കി. ടെക്നോസിറ്റിയില്‍ ആദ്യഘട്ടത്തില്‍ 30 ഏക്കറും രണ്ടാം ഘട്ടത്തില്‍ 40 ഏക്കറും സ്ഥലം നിസാന് കൈമാറും. ടെക്നോപാര്‍ക്ക് ഫേസ് മൂന്നില്‍ നിസാന്റെ പ്രവര്‍ത്തനം ഉടന്‍ ആരംഭിക്കാനാണ് തീരുമാനം. നിസാന്‍ ഡിജിറ്റല്‍ ഹബ്ബ് സ്ഥാപിക്കുന്നതിന് മന്ത്രിസഭായോഗം നേരത്തെ അനുമതി നല്‍കിയിരുന്നു. ഇതേതുടര്‍ന്നാണ് നടപടിക്രമങ്ങള്‍ വേഗത്തിലാക്കിയത്.