ഒറ്റതിരഞ്ഞെടുപ്പ് ആശയം; ജനാധിപത്യത്തെ അവേഹളിക്കുന്നതിന് തുല്യമെന്ന് ഹമീദ് അന്‍സാരി

ദേശീയ, സംസ്ഥാന തിരഞ്ഞെടുപ്പുകള്‍ ഒന്നിച്ച് നടത്താനുള്ള കേന്ദ്ര നീക്കത്തെ വിമര്‍ശിച്ച് മുന്‍ ഉപരാഷ്ട്രപതി ഹമീദ് അന്‍സാരി. ഒരു രാജ്യം ഒരു തിരഞ്ഞെടുപ്പ് എന്ന ആശയം ഇന്ത്യന്‍ ജനാധിപത്യത്തെ അവഹേളിക്കുന്നതാണെന്ന് അദ്ദേഹം പറഞ്ഞു. ഇന്ത്യ വൈവിധ്യങ്ങളുടെ നാടാണ്. വലിപ്പം കൊണ്ട് വലിയ രാജ്യമായ ഇന്ത്യയില്‍ ഇത്തരമൊരു ആശയം നടപ്പാകില്ല. സുരക്ഷാ ക്രമീകരണങ്ങളുടെ കാര്യത്തിലും പ്രശ്‌നങ്ങളുണ്ടാവും. തിരഞ്ഞെടുപ്പ് നടക്കുമ്പോള്‍ ഒരേസമയം രാജ്യത്ത് എല്ലായിടത്തും ഒരേപോലെ സുരക്ഷ ഒരുക്കാന്‍ എപ്രകാരം സാധിക്കുമെന്നും അദ്ദേഹം ചോദിച്ചു. തിരഞ്ഞെടുപ്പുകള്‍ ഒന്നിച്ച് നടത്തിയാല്‍ രാജ്യത്തിന് ഭീമമായ നഷ്ടമുണ്ടാകുമെന്ന് തിരഞ്ഞെടുപ്പ് കമ്മീഷന്‍ നേരത്തേ ചൂണ്ടിക്കാട്ടിയിരുന്നു.