കന്നുകാലികള്‍ക്കും ഉടമകള്‍ക്കും ഇന്‍ഷൂറന്‍സ് പരിരക്ഷ; ‘ഗോ സമൃദ്ധി പ്ലസ്’ പദ്ധതിക്ക് തുടക്കമായി

സംസ്ഥാനത്ത് കന്നുകാലികള്‍ക്കും ഉടമകള്‍ക്കും ഇന്‍ഷൂറന്‍സ് പരിരക്ഷ ഉറപ്പുവരുത്തുന്ന ‘ഗോ സമൃദ്ധി പ്ലസ്’ പദ്ധതിക്ക് തുടക്കമായി. മുഖ്യമന്ത്രി പിണറായി വിജയന്‍ ഗോ സമൃദ്ധി പ്ലസ് പദ്ധതിയെ കുറിച്ച് ഫേസ്ബുക്ക് പോസ്റ്റില്‍ വിശദമാക്കി. ഒരു വര്‍ഷം, മൂന്ന് വര്‍ഷം കാലയളവുകളിലേക്ക് ഈ പദ്ധതി പ്രകാരം ഇന്‍ഷൂറന്‍സ് പരിരക്ഷ ലഭിക്കും. പദ്ധതി അനുസരിച്ച് കര്‍ഷകനും രണ്ട് ലക്ഷം രൂപയുടെ അപകടമരണ ഇന്‍ഷൂറന്‍സ് ലഭിക്കുമെന്നും മുഖ്യമന്ത്രി ഫേസ്ബുക്ക് പോസ്റ്റില്‍ കൂട്ടിച്ചേര്‍ത്തു.

ഫേസ്ബുക്ക് പോസ്റ്റിന്റെ പൂര്‍ണ്ണരൂപം:

സംസ്ഥാനത്ത് കന്നുകാലികള്‍ക്കും ഉടമകള്‍ക്കും ഇന്‍ഷൂറന്‍സ് പരിരക്ഷ ഉറപ്പുവരുത്തുന്ന ‘ഗോ സമൃദ്ധി പ്ലസ് ‘പദ്ധതിക്ക് തുടക്കമായി. സര്‍ക്കാര്‍ സബ്സിഡിയോടെ കുറഞ്ഞ പ്രീമിയം നിരക്കില്‍ ഇന്‍ഷൂറന്‍സ് പരിരക്ഷ ഉറപ്പുവരുത്തുന്നതാണ് പദ്ധതി. ഒരു വർഷം, മൂന്ന് വർഷം എന്നീ കാലയളവുകളിലേക്ക് പദ്ധതി പ്രകാരം ഇൻഷൂറൻസ് പരിരക്ഷ ലഭ്യമാണ്. ഒരു വർഷത്തേക്ക് കന്നുകാലി വിലയുടെ 2.8%വും മൂന്നു വർഷത്തേക്ക് 6.54%വും പ്രീമിയം തുക അടച്ചാല്‍ മതി. ജനറൽ വിഭാഗത്തിന് പ്രീമിയം തുകയുടെ 50%വും എസ്.സി/എസ്.ടി വിഭാഗത്തിന് 70%വും സബ് സിഡി നൽകും. ജനറൽ വിഭാഗത്തിന് അൻപതിനായിരം രൂപ വിലയുള്ള പശുവിന് ഒരു വർഷത്തേക്കായി 700 രൂപയും മൂന്നുവർഷത്തേക്കായി 1635 രൂപയും പ്രീമിയം നൽകിയാൽ മതി. എസ്.സി/എസ്.ടി വിഭാഗത്തിന് ഇതേ നിരക്കിൽ യഥാക്രമം 420 രൂപയും 981 രൂപയും പ്രീമിയമായി നൽകണം. അൻപതിനായിരം രൂപയിൽ കൂടുതൽ വിലയുളള പശുവിന് അഡീഷണൽ പോളിസി സൗകര്യവുമുണ്ട്.