സിദ്ധരാമയ്യ വിളിച്ച് ചേര്‍ത്ത എംഎല്‍എമാരുടെ യോഗം ഇന്ന് രാവിലെ 11ന്

കർണാടക കോൺഗ്രസ്‌ പാലമെന്ററി പാർട്ടി നേതാവ് സിദ്ധരാമയ്യ വീണ്ടും എംഎൽഎമാരുടെ യോഗം വിളിച്ചു . ഇന്നു രാവിലെ 11 മണിക്ക് ബംഗലൂരുവിൽ വെച്ചാണ് യോഗം. എംഎൽഎമാരെ താമസിപ്പിച്ചിരിക്കുന്ന ഈഗിൽടൺ റിസോർട്ടിൽ വെച്ച് കഴിഞ്ഞ ദിവസം എംഎൽഎമാരിൽ ചിലർ തമ്മിൽ വാക്കേറ്റവും കയ്യാങ്കളിയും ഉണ്ടായി എന്ന വാർത്ത പുറത്ത് വന്നിരുന്നു . പിന്നാലെ കോൺഗ്രസ്‌ എംഎൽഎമാർ ഒറ്റക്കെട്ടാണെന്ന് കാണിക്കാനുള്ള ശ്രമത്തിലാണ് നേതൃത്വം.

ആനന്ദ് സിംഗ് എന്ന എംഎല്‍എയെയാണ് ആശുപത്രിയില്‍ പ്രവേശിപ്പിച്ചിരിക്കുന്നത്. മറ്റൊരു എംഎല്‍എയായ ജെഎന്‍ ഗണേഷ് മദ്യക്കുപ്പികൊണ്ട് തലയ്ക്ക് അടിച്ചാണ് പരിക്കേറ്റതെന്നാണ് സൂചന. ഗണേഷ് ബിജെപിയിലേക്ക് കൂറുമാറുകയാണെന്ന ആനന്ദ് ആരോപിച്ചതില്‍ ക്രുദ്ധനായി ആക്രമിക്കുകയായിരുന്നു.

ബെംഗളൂരു അപ്പോളോ ആശുപത്രിയില്‍ ചികിത്സയിലാണ് ആനന്ദ്. ആദ്യം വാര്‍ത്ത നിഷേധിച്ച കോണ്‍ഗ്രസ് ഇപ്പോള്‍ ആനന്ദിനെ ആശുപത്രിയില്‍ പ്രവേശിപ്പിച്ചിട്ടുണ്ടെന്ന് സമ്മതിച്ചിട്ടുണ്ട്. ദേഹാസ്വാസ്ഥ്യത്തെ തുടര്‍ന്നാണ് ഇദ്ദേഹത്തെ ആശുപത്രിയില്‍ പ്രവേശിപ്പിച്ചതെന്നാണ് കോണ്‍ഗ്രസ് വ്യക്തമാക്കുന്നത്. ഇക്കഴിഞ്ഞ വെള്ളിയാഴ്ചയാണ് ബിജെപിയുടെ ഓപ്പറേഷന്‍ താമരയെ പ്രതിരോധിക്കാന്‍ കോണ്‍ഗ്രസ് പാര്‍ട്ടി എംഎല്‍എമാരെ റിസോര്‍ട്ടുകളിലേക്ക് മാറ്റിയത്.