അനധികൃത പണപ്പിരിവ്; എയ്ഡഡ് സ്‌കൂളുകളിലും വിദ്യാഭ്യാസ വകുപ്പ് ഓഫീസുകളിലും വിജിലൻസിന്റെ മിന്നൽ പരിശോധന

സംസ്ഥാനത്തെ 45 ഓളം എയ്ഡഡ് സ്‌കൂളുകളിലും പതിനഞ്ച്  പൊതുവിദ്യാഭ്യാസ വകുപ്പ് ഓഫീസുകളിലും വിജിലൻസിന്റെ മിന്നൽ പരിശോധന. വിദ്യാർത്ഥികളുടെ പ്രവേശനത്തിന് അനധികൃതമായി പണം വാങ്ങുന്നുവെന്നും അധ്യാപകരുടെ നിയമനത്തിൽ ക്രമക്കേട് കാണിക്കുന്നുവെന്നുമുള്ള പരാതികളുടെ അടിസ്ഥാനത്തിലാണ് പരിശോധന.

‘ഓപ്പറേഷൻ ഈഗിൾ വാച്ച്’ എന്ന പേരിലാണ് സംസ്ഥാന വ്യാപകമായി ഉച്ചയ്ക്ക് 12 മണി മുതൽ മിന്നൽ പരിശോധന ആരംഭിച്ചിരിക്കുന്നത്. എയ്ഡഡ് സ്‌കൂളുകളിലെ നിയമനങ്ങൾക്ക് അംഗീകാരം നൽകുന്നതിന് ജില്ലാ വിദ്യാഭ്യാസ വകുപ്പ് ഓഫീസിലെ ഉദ്യോഗസ്ഥർ വൻ തുക ആവശ്യപ്പെടുന്നതായി ലഭിച്ച രഹസ്യവിവരത്തെ തുടർന്നാണ് വിദ്യാഭ്യാസ വകുപ്പ് ഓഫീസുകളിൽ പരിശോധന നടത്തുന്നത്.

Read Also; ഭക്ഷ്യ സുരക്ഷാ വകുപ്പ് ഓഫീസുകളിൽ വിജിലൻസിന്റെ മിന്നൽ പരിശോധന; വ്യാപക ക്രമക്കേട് കണ്ടെത്തി

മലപ്പുറത്ത് ഹയർസെക്കൻഡറി വിദ്യാഭ്യാസ ഉപഡയറക്ടറുടെ ഓഫീസിൽ നടത്തിയ റെയ്ഡിൽ കണക്കിൽ പെടാത്ത ഒരു ലക്ഷം രൂപ വിജിലൻസ് കണ്ടെടുത്തിട്ടുണ്ട്. ജൂനിയർ സൂപ്രണ്ട് ശ്രീകുമാറിന്റെ കൈവശമായിരുന്നു പണം. മലപ്പുറം വിജിലൻസ് ഡിവൈഎസ്പിയുടെ നേതൃത്വത്തിലായിരുന്നു പരിശോധന. മലപ്പുറം ജില്ലയിൽ മൂന്ന് സ്‌കൂളുകളിലാണ് പരിശോധന നടക്കുന്നത്. എറണാകുളത്ത് ജില്ലാ വിദ്യാഭ്യാസ ഓഫീസിലും കോതമംഗലത്ത് രണ്ട് സ്‌ക്കൂളുകളിലും പരിശോധന നടക്കുന്നുണ്ട്.