കൊവിഡ് 19 : രാജ്യത്ത് മരണസംഖ്യ 50 ആയി
രാജ്യത്ത് കൊറോണ വൈറസ് ബാധിച്ച് മരിച്ചവരുടെ എണ്ണം 50 ആയി. രാജസ്ഥാൻ, ഹരിയാന, പഞ്ചാബ്, ഗുജറാത്ത് എന്നിവിടങ്ങളിൽ ഓരോ മരണം വീതം റിപ്പോർട്ട് ചെയ്തതിന് പിന്നാലെയാണ് മരണസംഖ്യ 50 ആയി ഉയർന്നത്.
രാജസ്ഥാനിലെ അൽവാറിൽ 85 വയസുകാരനാണ് കൊറോണ ബാധിച്ച് മരിച്ചത്. ഹരിയാനയിൽ 67 കാരനും, ഗുജറാത്തിൽ 52 കാരനും, പഞ്ചാബിലെ അമൃത്സറിൽ 62 കാരനും മരണത്തിന് കീഴടങ്ങി.
അതേസമയം, രാജ്യത്ത് കൊവിഡ് സ്ഥിരീകരിച്ചവരുടെ എണ്ണം 1834 ആയി. ഇരുപത്തിനാല് മണിക്കൂറിനിടെ രോഗം സ്ഥിരീകരിച്ചവരുടെ എണ്ണം 400 കടന്നു. ആരോഗ്യ മന്ത്രാലയത്തിന്റെ ഔദ്യോഗിക കണക്ക് പ്രകാരം 1764 പേരാണ് ചികിത്സയിലുള്ളത്.144 പേർക്ക് രോഗം ഭേദമായി. 24 മണിക്കൂറിനിടെ മാത്രം രാജ്യത്ത് 437 പോസിറ്റീവ് കേസുകൾ റിപ്പോർട്ട് ചെയ്തു. മഹാരാഷ്ട്രയിൽ നാലും പശ്ചിമ ബംഗാളിൽ രണ്ടും മധ്യപ്രദേശ്, ഉത്തർപ്രദേശ് എന്നിവടങ്ങിൽ 1 വീതം മരണവുമാണ് ഇന്നലെ ഉണ്ടായത്. മുംബൈയിലെ ചേരിയായ ധാരാവിയിലടക്കം മരണം സ്ഥിരീകരിച്ചു. ഇതോടെ മഹാരാഷ്ട്രയിലെ മരണസംഖ്യ 16 ആയി ഉയർന്നു. നിസാമുദ്ദീനിലെ മതസമ്മേളനത്തിൽ പങ്കെടുത്ത മൂന്നുപേർകൂടി തെലങ്കാനയിൽ മരിച്ചതോടെ സംസ്ഥാനത്തെ മരണസംഖ്യ 9 ആയി.
തമിഴ്നാടാണ് രോഗബാധിതരുടെ എണ്ണം അതിവേഗം ഉയരുന്ന മറ്റൊരു സംസ്ഥാനം. ഇന്നലെ മാത്രം 110 പേർക്ക് രോഗം സ്ഥിരീകരിച്ചു. ഇതോടെ സംസ്ഥാനത്തെ രോഗബാധിതരുടെ എണ്ണം 234 ആയി. രോഗം സ്ഥിരീകരിച്ചതിൽ 80 പേരും നിസാമുദ്ദീനിലെ മതസമ്മേളനത്തിൽ പങ്കെടുത്തവരാണ്. അതേസമയം സംസ്ഥാനത്ത് സമൂഹ വ്യാപനമില്ലെന്ന് ആരോഗ്യ സെക്രട്ടറി ബീലാ രാജേഷ് പറഞ്ഞു. ആന്ധ്രയിൽ 67 പേർക്ക് കൂടി കൊവിഡ് സ്ഥിരീകരിച്ചു. എല്ലാവരും നിസാമുദ്ദീനിൽ നിന്ന് മടങ്ങിയെത്തിയവരാണ്.
Story Highlights- coronavirus,
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here