നാളത്തെ കൊവിഡ് അവലോകന യോഗം മാറ്റി; ബുധനാഴ്ച യോഗം ചേര്‍ന്നേക്കും

മുഖ്യമന്ത്രിയുടെ അധ്യക്ഷതയില്‍ സംസ്ഥാനത്ത് നാളെ ചേരാനിരുന്ന കൊവിഡ് അവലോകന യോഗം മാറ്റിവച്ചു. ബുധനാഴ്ച യോഗം ചേരാനാണ് സാധ്യത. ഓണാഘോഷങ്ങള്‍ക്ക് ശേഷമുള്ള നിയന്ത്രണങ്ങളിലും ഇളവുകള്‍ സംബന്ധിച്ചും തീരുമാനം കൊവിഡ് അവലോകന യോഗത്തിലുണ്ടാകും.

ഓണം ഇളവുകളും ആഘോഷങ്ങളും കൂടിയ സാഹചര്യത്തില്‍ വരുംദിവസങ്ങളില്‍ പ്രതിദിന കൊവിഡ് കണക്കുകളും കൂടുമോ എന്നാണ് ആശങ്ക. ഇന്നലത്തെ കൊവിഡ് കണക്കുകളിലും ആശങ്ക പ്രകടമാണ്. ടെസ്റ്റ് പോസിറ്റിവിറ്റി നിരക്കിലും വലിയ വര്‍ധനവുണ്ടായിട്ടുണ്ട്.

സംസ്ഥാനത്ത് ഇന്ന് 10,402 പേര്‍ക്കാണ് കൊവിഡ്-19 സ്ഥിരീകരിച്ചത്. മലപ്പുറം 1577, കോഴിക്കോട് 1376, പാലക്കാട് 1133, എറണാകുളം 1101, തൃശൂര്‍ 1007, കണ്ണൂര്‍ 778, കൊല്ലം 766, ആലപ്പുഴ 644, തിരുവനന്തപുരം 484, കോട്ടയം 415, പത്തനംതിട്ട 338, ഇടുക്കി 275, വയനാട് 265, കാസര്‍ഗോഡ് 243 എന്നിങ്ങനേയാണ് ജില്ലകളില്‍ ഇന്ന് രോഗ ബാധ സ്ഥിരീകരിച്ചത്. കഴിഞ്ഞ ദിവസങ്ങളിലുണ്ടായ 66 മരണങ്ങളാണ് കൊവിഡ്-19 മൂലമാണെന്ന് ഇന്ന് സ്ഥിരീകരിച്ചത്. ഇതോടെ ആകെ മരണം 19,494 ആയി.

Story Highlight: covid review meeting