പ്രധാനമന്ത്രി 16,000 കോടിക്ക് രണ്ട് വിമാനങ്ങൾ വാങ്ങി; 18,000 കോടിക്ക് എയർ ഇന്ത്യ വിറ്റു; പ്രിയങ്ക ഗാന്ധി

ലഖിംപൂർ ഖേരി സംഭവത്തിന് പിന്നാലെ യുപിയിലെ വാരണാസിയിൽ വൻ ജനാവലിയെ അഭിസംബോധന ചെയ്ത് പ്രിയങ്ക ഗാന്ധി. പ്രധാന മന്ത്രി 16,000 കോടിക്ക് രണ്ട് വിമാനങ്ങൾ വാങ്ങി; 18,000 കോടിക്ക് എയർ ഇന്ത്യ വിറ്റുവെന്നും പ്രിയങ്ക ഗാന്ധി. വാരണാസിയിൽ കിസാൻ ന്യായ് റാലിയെ അഭിസംബോധന ചെയ്‌ത്‌ സംസാരിക്കുകയായിരുന്നു പ്രിയങ്ക ഗാന്ധി.

യുപി സർക്കാരിനും കേന്ദ്രസർക്കാരിനുമെതിരെ അതിരൂക്ഷ വിമർശനമാണ് പ്രിയങ്ക ഉന്നയിച്ചത്. കർഷകർക്കും സ്ത്രീകൾക്കും യുപിയിൽ നീതി ലഭിക്കുന്നില്ല, ലഖ്‌നൗവിൽ വന്ന പ്രധാനമന്ത്രി നരേന്ദ്ര മോദിക്ക് ലഖിംപൂരിലെത്താൻ ഇതുവരെ കഴിഞ്ഞില്ലെന്നും കുറ്റപ്പെടുത്തി.

രാജ്യത്ത് തൊഴിലില്ല, ഇന്ധന വില ഇരട്ടിയായി, ഇനിയും നിശബ്ദരായി ഇരിക്കാൻ പാടില്ല. ജയിലിൽ അടച്ചാലും ഭീഷണിപ്പെടുത്തിയാലും നിശ്ശബ്ദരാക്കാൻ സാധിക്കില്ലെന്നും പ്രിയങ്ക വ്യക്തമാക്കി. രാജ്യത്ത് രണ്ട് കൂട്ടർ മാത്രമാണ് സുരക്ഷിതർ. അധികാരത്തിലുള്ള ബിജെപി നേതാക്കളും, അവരുടെ പണക്കാരായ സുഹൃത്തുക്കളും മാത്രമാണതെന്നും പ്രിയങ്ക കുറ്റപ്പെടുത്തി.

Story Highlights: priyanka-gandhi-criticizes-pm-modi-and-up-govt-at-varanasi