രാഹുല്‍ മാങ്കൂട്ടത്തിലിനെ പുറത്താക്കാന്‍ കോണ്‍ഗ്രസ്; നടപടി സ്വീകരിക്കാന്‍ ഹൈക്കമാന്‍ഡ് കെപിസിസി പ്രസിഡന്റിന് നിര്‍ദ്ദേശം നല്‍കി

ലൈംഗികപീഡന-ഭ്രൂണഹത്യാ കേസുകളില്‍ പ്രതിയായ രാഹുല്‍ മാങ്കൂട്ടത്തില്‍ എംഎല്‍എയെ പുറത്താക്കാന്‍ കോണ്‍ഗ്രസ്. രാഹുലിന് എതിരെ നടപടി സ്വീകരിക്കാന്‍ ഹൈക്കമാന്‍ഡ് കെപിസിസി പ്രസിഡന്റിന് നിര്‍ദ്ദേശം നല്‍കി. ഇന്ന് തന്നെ രാഹുലിനെതിരെ നടപടിയെടുത്തേക്കുമെന്നാണ് സൂചന.

എഐസിസി ജനറല്‍ സെക്രട്ടറി കെസി വേണുഗോപാലാണ് നിര്‍ദ്ദേശം നല്‍കിയത്. പാര്‍ട്ടിയാണ് വലുത്, പാര്‍ട്ടിയുടെ അന്തസ് ഉയര്‍ത്തിപ്പിടിക്കുന്ന തീരുമാനം ഉണ്ടാകണം എന്നാണ് നിര്‍ദേശം. പ്രധാന നേതാക്കളുടെ അഭിപ്രായം അറിഞ്ഞ ശേഷം നടപടി പ്രഖ്യാപിക്കാനും വ്യക്തമാക്കിയിട്ടുണ്ട്.

പുകഞ്ഞ കൊള്ളി പുറത്തെന്നും ബ്രഹ്‌മാസ്ത്രം പ്രയോഗിക്കേണ്ട സമയമായെന്നും കെ മുരളീധരന്‍ തുറന്നടിച്ചു. പാര്‍ട്ടി ചുമതലയേല്‍പ്പിച്ചത് മതില്‍ ചാടാന്‍ അല്ലെന്നും കെ മുരളീധരന്റെ പ്രതികരണം.

രാഹുല്‍ മാങ്കൂട്ടത്തിനെതിരെ ദീപ്തി മേരി വര്‍ഗീസും രംഗത്തെത്തി. നേരത്തെ തന്നെ ഈ വിഷയത്തില്‍ പാര്‍ട്ടി നിലപാട് വ്യക്തമാക്കിയതാണെന്നും മറ്റു പാര്‍ട്ടിക്കാരെപോലെ ആരെയും കോണ്‍ഗ്രസ് സംരക്ഷിക്കില്ല – അവര്‍ വ്യക്തമാക്കി.

വിഷയത്തില്‍ പാര്‍ട്ടിയുടെ തീരുമാനം ആണ് തന്റേതുമെന്ന് ഷാഫി പറമ്പില്‍ പ്രതികരിച്ചു. എന്റെ അടുപ്പം പാര്‍ട്ടി തീരുമാനത്തെ ബാധിച്ചിട്ടില്ല. നിയമപരമായ കാര്യങ്ങളില്‍ പാര്‍ട്ടി ഇടപെടില്ല – അദ്ദേഹം പറഞ്ഞു.

Story Highlights : Congress to expel Rahul Mamkoottathil