”നാളെ ഡു ഓര്‍ ഡൈ മത്സരമാണ്, നൂറ് ശതമാനം നല്‍കണം”; ശ്രീജേഷിന്റെ വാക്കുകള്‍ പിളേളര്‍ ഏറ്റെടുത്തപ്പോള്‍ വീണത് അര്‍ജന്റീന

ഹോക്കി ജൂനിയര്‍ ലോകകപ്പില്‍ അര്‍ജന്റീനയെ അടിച്ചിട്ട ടീം ഇന്ത്യ കുട്ടികള്‍ക്ക് പ്രചോദനമായത് മലയാളി കൂടിയായ കോച്ച് പിആര്‍ ശ്രീജേഷിന്റെ വാക്കുകള്‍. മത്സരത്തിന്റെ തലേ ദിവസമാണ് ഇന്ത്യന്‍ സീനിയര്‍ ഹോക്കി ടീമിന്റെ ഗോള്‍ കീപ്പര്‍ കൂടിയായിരുന്ന ശ്രീജേഷ് കുട്ടികളെ പ്രോത്സാഹിപ്പിച്ചത്. ”നാളെ ഒരു ഡു-ഓര്‍-ഡൈ മത്സരമാണ്. ഓരോ കളിക്കാരും അവരുടെ നൂറ് ശതമാനം തന്നെ നല്‍കണം.”- ഇതായിരുന്നു കുട്ടികളോട് ശ്രീജേഷ് പറഞ്ഞിരുന്നത്. അടിസ്ഥാന കാര്യങ്ങളില്‍ ശ്രദ്ധ കേന്ദ്രീകരിക്കണം. ഇന്ത്യയുടെ വിജയം ആഘോഷിക്കാന്‍ ഒരു വലിയ ജനക്കൂട്ടമുണ്ട്. ശ്രീജേഷ് പറഞ്ഞു. അതേസമയം, സ്‌പെയിനിനെതിരെ സെമിഫൈനലില്‍ പുറത്തായ അര്‍ജന്റീന മൂന്നാം സ്ഥാനത്തിനായി കടുത്ത പോരാട്ടം തന്നെ നടത്തുമെന്ന് ഇന്ത്യന്‍ കോച്ച് കുട്ടികള്‍ക്ക് മുന്നറിയിപ്പ് നല്‍കി.

അങ്ങേയറ്റം പ്രഫഷണലായി അര്‍ജന്റീന ടീം കളിക്കും. മെഡലിനായി പോരാടാനുള്ള വ്യക്തമായ പ്ലാന്‍ ഞങ്ങള്‍ തയ്യാറാക്കിയിട്ടുണ്ട്. വെങ്കലം നേടുന്നത് കുട്ടികള്‍ക്ക് ഒരു മികച്ച സമ്മാനമായിരിക്കും. മത്സരത്തിന് മുന്നോടിയായി അര്‍ജന്റീനയുടെ കോച്ച് ദുവാന്‍ ഗില്ലാര്‍ഡ് പറഞ്ഞു. ഇതുവരെയുള്ള നേട്ടങ്ങളില്‍ സന്തുഷ്ടരാണ്. പക്ഷേ ഇന്ത്യക്കെതിരെ ഒരു പോരാട്ടം കൂടി ബാക്കിയുണ്ട്. സ്റ്റേഡിയത്തില്‍ ഒരു വലിയ ജനക്കൂട്ടത്തിന് മുമ്പാക ഇറങ്ങുമ്പോള്‍ ആവേശം വര്‍ധിക്കുമെന്നും അര്‍ജന്റീന കോച്ച് പറഞ്ഞു.

Story Highlights: Argentina vs India Junior Hockey World Cup 2026