രക്തസാക്ഷി ഫണ്ട് തട്ടിപ്പ്; പയ്യന്നൂർ എംഎൽഎയുടെ രാജി ആവശ്യപ്പെട്ട് പ്രതിഷേധം; സിപിഐഎം പ്രവർത്തകർ ആക്രമിച്ചെന്ന് കോൺഗ്രസ്‌ പ്രവർത്തകർ

പയ്യന്നൂരിലെ രക്തസാക്ഷി ഫണ്ട് തട്ടിപ്പിൽ കോൺഗ്രസ് ബിജെപി പ്രവർത്തകർ പ്രകടനം നടത്തി. പ്രകടനത്തിനിടെ പൊലീസുമായി ഉന്തും തള്ളും ഉണ്ടായി. പ്രതിഷേധത്തിനിടെ സിപിഐഎം പ്രവർത്തകരും കോൺഗ്രസ്‌ പ്രവർത്തകരും ഏറ്റുമുട്ടി. സിപിഐഎം പ്രവർത്തകർ ആക്രമിച്ചെന്ന് കോൺഗ്രസ്‌ പ്രവർത്തകർ ആരോപിച്ചു.

ടിഐ മധുസൂദനൻ എംഎൽഎ രാജിവെക്കണമെന്നാവശ്യപ്പെട്ട് നടത്തിയ പ്രകടനത്തിന് നേരെയാണ് അക്രമം. പരുക്കേറ്റ പ്രതിഷേധക്കാരെ ആശുപത്രിയിലേക്ക് മാറ്റി.രക്തസാക്ഷി ഫണ്ട് തട്ടിപ്പുമായി ബന്ധപ്പെട്ട് വി കുഞ്ഞികൃഷ്ണന്റെ ആരോപണങ്ങൾ എല്ലാം തള്ളുകയാണ് സിപിഐഎം നേതൃത്വം. പാർട്ടിയെ തകർക്കാനാണ് നീക്കമെന്നും താൻ ഒഴികെ മറ്റെല്ലാവരും കള്ളന്മാർ എന്ന് സ്ഥാപിക്കാനാണ് കുഞ്ഞികൃഷ്ണന്റെ ശ്രമമെന്നുമാണ് എം വി ജയരാജൻ പ്രതികരിച്ചത്.

തന്‍റെ ആരോപണങ്ങൾക്ക് കൃത്യമായ മറുപടി പറയാൻ നേതൃത്വം തയ്യാറാകണമെന്ന് കുഞ്ഞികൃഷ്ണൻ ആവർത്തിച്ചു. പയ്യന്നൂർ മേഖലയിൽ കുഞ്ഞികൃഷ്ണനെതിരെ വ്യാപകമായി സിപിഐഎം പോസ്റ്ററുകൾ പതിച്ചിട്ടുണ്ട്.

Story Highlights : kannur over fund fraud case cpim attacks congress bjp