നമ്മൾ ഉദ്ദേശിച്ച ആളല്ല ലൗലജൻ ; മോഹൻലാൽ, തരുൺ മൂർത്തി ചിത്രത്തിന്റെ ഫസ്റ്റ് ലുക്ക് പുറത്ത്

തുടരും എന്ന ബ്ലോക്കബ്സ്റ്റർ ചിത്രത്തിന് ശേഷം തരുൺ മൂർത്തിയും മോഹൻലാലും വീണ്ടും ഒരുമിക്കുന്ന L366 എന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തു. മോഹൻലാൽ പോലീസ് വേഷത്തിൽ നിൽക്കുന്ന ചിത്രമാണ് പോസ്റ്ററിൽ ഉള്ളത്. റിലീസ് ചെയ്ത് നിമിഷങ്ങൾക്കകം പോസ്റ്റർ സോഷ്യൽ മീഡിയയിൽ വൈറൽ ആകുകയും ചെയ്തു.

മോഹൻലാൽ താടി വടിച്ച് മീശ പിരിച്ചുള്ള തന്റെ ചിത്രം സോഷ്യൽ മീഡിയയിൽ വളരെയധികം ആഘോഷിക്കപ്പെട്ടിരുന്നു. തരുൺ മൂർത്തി സംവിധാനം ചെയ്യുന്നത് ഒരു പോലീസ് ഉദ്യോഗസ്ഥന്റെ കഥയാണ് എന്ന വാർത്തകൾ പുറത്തു വന്നത് മുതൽ മോഹൻലാൽ പോലീസ്സ് വേഷത്തിൽ നിൽക്കുന്ന ചിത്രങ്ങൾ ai ഉപയോഗിച്ച് ആരാധകർ നിർമ്മിച്ച് പ്രചരിപ്പിച്ചു.

എന്നാൽ ഫസ്റ്റ് ലുക്കിൽ മോഹൻലാൽ യൂണിഫോമിലാണെങ്കിലും ആരാധകർ പ്രതീക്ഷിച്ചതിലും നിന്നും തീർത്തും വ്യത്യസ്തമായി ചിത്രം ഒരു കോമഡി ഫാമിലി എന്റർടൈനർ ആണെന്ന് സൂചിപ്പിക്കുന്നത് പോലെ വളരെ രസകരമായൊരു നിൽപ്പാണ് മോഹൻലാൽ പോസ്റ്ററിൽ. ടക്ക് ഇൻ ചെയ്യാതെ, ബൂട്ട് കയ്യിൽ പിടിച്ച് കാലിൽ റബർ ചെരുപ്പ് അണിഞ്ഞുകൊണ്ട് പിന്നോട്ട് ചാഞ്ഞു നിൽക്കുന്ന മോഹൻലാലിനെ ഈ രൂപത്തിൽ കാണുമെന്ന് കരുതിയില്ല എന്നാണ് ആരാധകർ പറയുന്നത്.

ഏതായാലും പോസ്റ്റർ ഇതിനകം മോഹൻലാൽ ആരാധകർ ഏറ്റെടുത്തിട്ടുണ്ട്. പോസ്റ്ററിൽ നൽകിയിട്ടുള്ള മോഹൻലാൽ അവതരിപ്പിക്കുന്ന കഥാപാത്രത്തിന്റെ പേരാണ് ഇപ്പോൾ മറ്റൊരു ചർച്ചാവിഷയം. ‘സ്നേഹത്തിന്റെ പ്രതിരൂപമായ മനുഷ്യൻ – ടി എസ് ലൗലജനെ’ അവതരിപ്പിക്കുന്നു. മീര ജാസ്മിനാണ് ചിത്രത്തിൽ മോഹൻലാലിൻറെ നായികയാകുന്നത്.

Story Highlights :Who is this lovelajan? ; Mohanlal, Tharun Murthy’s combo’s 2nd film’s first look is out