കൂലി അത്ര ഇഷ്ടപ്പെട്ടില്ല, എങ്കിലും ഫ്ലാഷ്ബാക്ക് കൊള്ളാം ; സൗന്ദര്യ രജനികാന്ത്

ലോകേഷ് കനഗരാജിന്റെ സംവിധാനത്തിൽ രജനികാന്ത് നായകനായെത്തിയ കൂലിയെ കുറിച്ച് രജനികാന്തിന്റെ മകളും സംവിധായികയും നിർമ്മാതാവുമായ സൗന്ദര്യ രജനികാന്തിന്റെ അഭിപ്രായം സോഷ്യൽ മീഡിയയിൽ ശ്രദ്ധ നേടുന്നു. വമ്പൻ ഹൈപ്പുമായി റിലീസിനെത്തിയ ചിത്രം വിജയമായെങ്കിലും ആരാധകരിൽ നിന്നും ഒട്ടേറെ വിമർശനങ്ങൾ നേരിട്ടിരുന്നു.

“ചിത്രത്തിന്റെ അവസാന 10 മിനുട്ട് എനിക്ക് വളരെയധികം ഇഷ്ട്ടമായി, പ്രത്യേകിച്ചും ആ ഡീഏജിങ് ഫ്ലാഷ്ബാക്ക് സീനുകൾ. എന്നാൽ ചിത്രം മുഴുവനായി നോക്കിയാൽ എനിക്ക് ഏറ്റവും ഇഷ്ട്ടപ്പെട്ട 10 രജനികാന്ത് ചിത്രങ്ങളിൽ ഞാൻ കൂലിയെ ഉൾപ്പെടുത്തില്ല. അച്ഛൻ എന്നതിലുപരി ഒരു തലൈവർ ഫാൻ എന്ന രീതിയിൽ നോക്കിയാൽ ചിത്രത്തിൽ എനിക്ക് ഇപ്പോൾ ഉള്ളതിലുമേറെ സമയം രജനികാന്തിനെ കാണണമായിരുന്നു” സൗന്ദര്യ രജനികാന്ത് പറഞ്ഞു.

കൂലിയുടെ റിലീസിന് ശേഷം പ്രധാനമായും പറഞ്ഞു കേട്ട വിമർശനം ചിത്രത്തിലെ എണ്ണിയാലൊടുങ്ങാത്ത പ്ലോട്ട് ഹോളുകളും ലോജിക്കൽ പിശകുകളും ആയിരുന്നു. രജനിയെ കൂടാതെ നാഗാർജുന, ആമിർ ഖാൻ, ഉപേന്ദ്ര തുടങ്ങിയ വമ്പൻ താരങ്ങൾ ചിത്രത്തിൽ വേണ്ടിയ രീതിയിൽ ഉപയോഗിച്ചില്ല എന്നും ആരാധകർ പ്രതികരിച്ചിരുന്നു.

മദന്റെ സംവിധാനത്തിൽ അനശ്വര രാജൻ നായികയായും ടൂറിസ്റ്റ് ഫാമിലിയുടെ സംവിധായകൻ അബിഷാൻ നായകനുമാകുന്ന റൊമാന്റിക്ക് ചിത്രം ‘വിത്ത് ലവ്’ എന്ന ചിത്രത്തിന്റെ നിർമ്മാതാവ് എന്ന നിലയിൽ നൽകിയ പ്രമോഷണൽ അഭിമുഖത്തിലാണ് സൗന്ദര്യ രജനികാന്ത് കൂലിയെ പറ്റി മനസ് തുറന്നത്.

Story Highlights :Didn’t like the ‘coolie’ that much, but flashback potion’s were good ; Soundarya Rajinikanth