തിരുവനന്തപുരം നഗരസഭയിലെ BJP കൗൺസിലർമാർ ഡൽഹിയിലേക്ക്; പ്രധാനമന്ത്രിയുമായി കൂടിക്കാഴ്ച നടത്തും

തിരുവനന്തപുരം നഗരസഭയിലെ BJP കൗൺസിലർമാർ ഡൽഹിയിലേക്ക്. പ്രധാനമന്ത്രിയുമായി 50 കൗൺസിലർമാരും കൂടിക്കാഴ്ച നടത്തും. ഈ മാസം 9 ന് ഡൽഹിയിലേക്ക് തിരിക്കും. 13 ന് പ്രധാനമന്ത്രിയുമായി കൂടിക്കാഴ്ച നടത്തും.

തിരുവനന്തപുരം നഗരത്തിന്റെ വികസന കാര്യങ്ങൾ ചർച്ച ചെയ്യും. വിവിധ റെയിൽവേ സ്റ്റേഷനുകളിൽ കൗൺസിലർമാർക്ക് സ്വീകരണം നൽകും. സ്വതന്ത്ര കൗൺസിലർ പാറ്റൂർ രാധാകൃഷ്ണനും ചടങ്ങിൽ പങ്കെടുക്കും.

ബിജെപി കേന്ദ്ര നേതൃത്വം സംഘടിപ്പിക്കുന്ന പ്രത്യേക പരിപാടിയിലേക്കാണ് പ്രധാനമന്ത്രിയുടെ ഓഫീസ് മേയ‍ർ വിവി രാജേഷിൻ്റെ നേതൃത്വത്തിലുള്ള കൗൺസിലർമാരെ ക്ഷണിച്ചത്. പ്രധാനമന്ത്രി ഒരുക്കുന്ന അത്താഴ വിരുന്നിലും കൗൺസിലർമാർ പങ്കെടുക്കും.

ഫെബ്രുവരി 13ന് പ്രധാനമന്ത്രി ഒരുക്കുന്ന അത്താഴ വിരുന്ന് നടക്കുമെന്നാണ് റിപ്പോർട്ട്. തുടർന്ന് അന്ന് രാത്രി കൗൺസിലർമാർ വിമാനത്തിൽ തലസ്ഥാനത്തേക്ക് മടങ്ങും.

സംസ്ഥാന ചരിത്രത്തിൽ ബിജെപി ഭരണം പിടിക്കുന്ന ആദ്യ കോ‍ർപറേഷൻ ആയി മാറിയിരിക്കുകയാണ് തിരുവനന്തപുരം. 101 അംഗ കൗൺസിലിൽ 50 സീറ്റുകൾ പിടിച്ചെടുത്താണ് ബിജെപി മുന്നേറ്റം നടത്തിയത്. ഭരണത്തിലുണ്ടായിരുന്ന എൽഡിഎഫ് 29 സീറ്റുകളിലേക്ക് ഒതുങ്ങിയപ്പോൾ കോൺഗ്രസ് 20 സീറ്റുകൾ പിടിച്ച് സീറ്റ് നില വർധിപ്പിച്ചു. രണ്ട് സ്വതന്ത്രന്മാരും വിജയിച്ചു. ഒരു സ്വതന്ത്രൻ്റെ പിന്തുണയോടെ ആണ് ബിജെപി കോർപറേഷൻ ഭരണം പിടിച്ചെടുത്തത്.

Story Highlights : thiruvananthapuram corporation bjp councillors to delhi