അമേരിക്ക -ഇറാന് ചര്ച്ച പരാജയം; കരാറിലെത്താതെ മടങ്ങുകയാണെന്ന് ജെ ഡി വാന്സ്
3 minutes Read
സ്ഥിരം വെടിനിര്ത്തലുളള അമേരിക്ക -ഇറാന് ചര്ച്ച പരാജയം. 21 മണിക്കൂര് നീണ്ട ചര്ച്ചകള്ക്ക് ശേഷം കരാറിലെത്താതെ മടങ്ങുകയാണെന്ന് അമേരിക്കന് വൈസ് പ്രസിഡന്റ് ജെ ഡി വാന്സ്. അമേരിക്കയുടെ നിബന്ധനകള് പലതും അംഗീകരിക്കാന് ഇറാന് തയാറായില്ലെന്നും വാന്സ് പറയുന്നു. (JD Vance says he is heading back to US)
കരാറിലെത്താന് ആകാത്തത് ഇറാനും അമേരിക്കയ്ക്കും മോശം വാര്ത്തയാണെന്നും വാന്സ്. മണിക്കൂറായി ഇറാനുമായി ചര്ച്ചകളില് ഏര്പ്പെടുകയാണെന്നും പാകിസ്താന്റെ മധ്യസ്ഥതയ്ക്ക് നന്ദി പറയുന്നുവെന്നും വാന്സ് പറഞ്ഞു. ചര്ച്ചയ്ക്കിടെ ആറോളം തവണ ട്രംപുമായി സംസാരിച്ചുവെന്നും വാന്സ് വ്യക്തമാക്കി.
കരാറിലെത്താന് പരമാവധി ശ്രമിക്കണമെന്നാണ് ട്രംപ് പറഞ്ഞതെന്നും നിര്ഭാഗ്യവശാല് അതിന് കഴിഞ്ഞില്ലെന്നും അദ്ദേഹം വ്യക്തമാക്കി. ആണവായുധം നിര്മ്മിക്കില്ലെന്ന് ഇറാനില് നിന്നും അമേരിക്കയ്ക്ക് ഉറപ്പ് ആവശ്യമാണെന്ന് അദ്ദേഹം പറഞ്ഞു.
അമേരിക്ക യുക്തിരഹിതമായ ആവശ്യങ്ങള് ഉന്നയിക്കുന്നുവെന്നും അടിക്കടി നിലപാട് മാറ്റുവെന്നും ഇറാന് വാര്ത്താ ഏജന്സി റിപ്പോര്ട്ട് ചെയ്യുന്നു. ഹോര്മുസ് കടലിടുക്ക് തുറക്കുന്നതടക്കം നിരവധി തര്ക്കവിഷയങ്ങള് ഇപ്പോഴും തുടരുന്നുവെന്നും ഇറാന് പറയുന്നു. മധ്യസ്ഥരാജ്യമായ പാകിസ്താന് അഭിപ്രായഭിന്നതകള് പരിഹരിക്കാന് ശ്രമിക്കുകയാണെന്നും ചര്ച്ചകള് പുനരാരംഭിക്കുമെന്നുമാണ് ഇറാന് വാര്ത്താ ഏജന്സിയുടെ ഭാഗത്ത് നിന്നുള്ള റിപ്പോര്ട്ടുകള്.
യുദ്ധം വഴി നേടാന് കഴിയാത്തതെല്ലാം അമേരിക്ക ചര്ച്ചകളിലൂടെ ആവശ്യപ്പെടുകയാണെന്നാണ് ഇറാന് പറയുന്നത്. ഹോര്മുസ് കടലിടുക്കിന്റെ കാര്യത്തിലും സമാധാനപരമായ ആണവോര്ജത്തിന്റെ കാര്യത്തിലും മറ്റ് വിഷയങ്ങളിലും അമേരിക്കയുടെ നിബന്ധനകള് അംഗീകരിക്കാന് തയാറല്ലെന്ന് ഇറാന് വ്യക്തമാക്കി.
Story Highlights : JD Vance says he is heading back to US without a deal
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
English