‘നിയമസഭാ സീറ്റ് വർധിപ്പിക്കാനുള്ള കേന്ദ്ര നീക്കത്തിനെതിരെ ഒന്നിച്ച് നിൽക്കണം’; മുഖ്യമന്ത്രി പിണറായി വിജയന്റെ പിന്തുണ തേടി രേവന്ത് റെഡ്ഡി

നിയമസഭാ സീറ്റ് വർധിപ്പിക്കാനുള്ള കേന്ദ്ര നീക്കത്തിനെതിരെ മുഖ്യമന്ത്രി പിണറായി വിജയന്റെ പിന്തുണ തേടി തെലങ്കാന മുഖ്യമന്ത്രി രേവന്ത് റെഡ്ഡിയുടെ കത്ത്. തെക്കൻ സംസ്ഥാനങ്ങളുടെ താൽപ്പര്യങ്ങൾക്ക് വിരുദ്ധമായ നീക്കത്തിനെതിരെ ഒന്നിച്ചു നിൽക്കണം. പതിറ്റാണ്ടുകളായി നേരിടുന്ന തെക്ക്-വടക്ക് വിഭജനത്തിന്റെ പുതിയ നീക്കമാണ് ലോക്സഭാ സീറ്റുകളുടെ വിപുലീകരണമെന്നും കത്തിൽ പരാമർശം.

സാമ്പത്തിക വിഭജനത്തിലും തെക്കൻ സംസ്ഥാനങ്ങളെ കേന്ദ്രം ഒറ്റപ്പെടുത്തുകയാണ്. സാമ്പത്തിക അനീതിക്ക് പുറമേ രാഷ്ട്രീയപരമായി ഒറ്റപ്പെടുത്താനുള്ള നീക്കമാണ്. ശക്തമായ പ്രതിരോധം തീർക്കണമെന്നും രേവന്ത് റെഡ്ഡി ആവശ്യപ്പെട്ടു. വനിതാ സംവരണം നടപ്പിലാക്കുന്നതിന് മുന്നോടിയായി ലോക്സഭ സീറ്റുകളുടെ എണ്ണം 850 ആക്കി വർദ്ധിപ്പിക്കുന്ന മണ്ഡല പുനർനിർണ ബിൽ പാർലമെന്റിൽ അവതരിപ്പിക്കാനാണ് കേന്ദ്രസർക്കാർ നീക്കം.

Read Also: ലോക്സഭാ സീറ്റുകളുടെ എണ്ണം 850 ആയി വർധിപ്പിക്കാൻ കേന്ദ്രസർക്കാർ; ഡിലിമിറ്റേഷൻ കമ്മീഷൻ രൂപീകരിക്കും

സംസ്ഥാനങ്ങളിൽ 815 സീറ്റുകളും കേന്ദ്രഭരണ പ്രദേശങ്ങളിലേത് 35 സീറ്റുമായി വർദ്ധിപ്പിക്കാനാണ് കേന്ദ്രസർക്കാർ തീരുമാനിച്ചിരിക്കുന്നത്. മണ്ഡല പുനർനിർണത്തിന് ഒരു സുപ്രീം കോടതി ജഡ്ജി, മുഖ്യ തിരഞ്ഞെടുപ്പ് കമ്മീഷണർ അല്ലെങ്കിൽ അദ്ദേഹം നിർദ്ദേശിക്കുന്ന വ്യക്തി, സംസ്ഥാനങ്ങളിലെ മുഖ്യ തിരഞ്ഞെടുപ്പ് ഓഫീസർമാർ എന്നിവർ അടങ്ങിയ സമിതി രൂപീകരിക്കും. ഏപ്രിൽ 16ന് പ്രത്യേക പാർലമെൻറ് സമ്മേളനത്തിൽ അവതരിപ്പിക്കാൻ ഒരുങ്ങുന്ന ബില്ലുകളുടെ പകർപ്പുകൾ എംപിമാർക്ക് നൽകി.

മണ്ഡല പുനർനിർണ ബിൽ, കേന്ദ്രഭരണ നിയമ ഭേദഗതി ബിൽ, ഭരണഘടനയുടെ 131 ഭേദഗതി ബിൽ എന്നിങ്ങനെ മൂന്ന് ബില്ലുകൾ ആണ് പ്രത്യേക പാർലമെൻറ് സമ്മേളനത്തിൽ കൊണ്ടുവരുന്നത്. മണ്ഡല പുനർനിർണയത്തിന് ശേഷം മൂന്നിലൊന്ന് സീറ്റുകൾ വനിതകൾക്കായി സംവരണം ചെയ്യും. 2029 ൽ നിയമം നടപ്പിലാക്കാനാണ് കേന്ദ്രസർക്കാരിൻറെ ശ്രമം. ഡീ ലിമിറ്റേഷനിൽ ആശങ്ക പ്രകടിപ്പിച്ചാണ് പ്രതിപക്ഷ പാർട്ടികൾ രംഗത്തെത്തിയിരിക്കുന്നത്.

Story Highlights : Revanth Reddy seeks support from CM Pinarayi Vijayan against delimitation bill