എഎപി വിട്ടവര്‍ക്ക് ആപ്പ്; പാര്‍ട്ടി വിട്ട 3 എംപിമാരെ അയോഗ്യരാക്കണമെന്ന് ആവശ്യപ്പെട്ട് രാജ്യസഭ ചെയര്‍മാന് കത്ത് നല്‍കാന്‍ എഎപി

പാര്‍ട്ടിക്ക് കനത്ത ആഘാതം ഏല്‍പ്പിച്ച് പാര്‍ട്ടി വിട്ട് ബിജെപിയിലേക്ക് പോയ എംപിമാര്‍ക്കെതിരെ നീക്കവുമായി ആം ആദ്മി പാര്‍ട്ടി. ആം ആദ്മി വിട്ട് ബിജെപിയിലേക്ക് പോയ രാജ്യസഭാ എംപിമാരെ അയോഗ്യരാക്കണമെന്ന് ആവശ്യപ്പെട്ട് കത്ത് നല്‍കാനാണ് പാര്‍ട്ടിയുടെ നീക്കം. രാഘവ് ചദ്ദ, അശോക് മിത്തല്‍, സന്ദീപ് പഥക് എന്നിവരെ അയോഗ്യരാക്കണമെന്ന് ആവശ്യപ്പെട്ട് കത്ത് നല്‍കുമെന്ന് സഞ്ജയ് സിങ് എംപി അറിയിച്ചു. ഏഴ് രാജ്യസഭാംഗങ്ങളാണ് എഎപി ബന്ധം ഉപേക്ഷിച്ച് ബിജെയിപിലേക്ക് ചേക്കേറുന്നത്. (AAP to submit letter to Rajya Sabha Chairman for disqualification of MPs joined BJP)

ഭരണഘടനയുടെ പത്താം ഷെഡ്യൂല്‍ പ്രകാരം ഇവരെ അയോഗ്യരാക്കാന്‍ കത്തുനല്‍കുമെന്നാണ് എഎപി അറിയിച്ചിരിക്കുന്നത്. രാജ്യസഭയിലെ ആകെ എഎപി എംപിമാരില്‍ മൂന്നില്‍ രണ്ടോളം അംഗങ്ങളും പാര്‍ട്ടി വിട്ട് ബിജെപിയില്‍ ചേക്കേറിയത് ആം ആദ്മി പാര്‍ട്ടിക്ക് ഏല്‍പ്പിച്ചിരിക്കുന്നത് കനത്ത പ്രഹരമാണ്. പാര്‍ലമെന്റില്‍ ആംആദ്മി പാര്‍ട്ടിയെ ദുര്‍ബലപ്പെടുത്തിയാണ് രാഘവ് ഛദ്ദ ഉള്‍പ്പെടെയുള്ള 7 എംപിമാരുടെ കൂറുമാറ്റം. ഏറെ നാളായി ആം ആദ്മി പാര്‍ട്ടി നേതൃത്വവും രാഘവ് ഛദ്ദയും തമ്മിലുള്ള അഭിപ്രായവ്യത്യാസങ്ങള്‍ തുടര്‍ന്നിരുന്നു.I’m the right man in the wrong party എന്ന് പറഞ്ഞാണ് മറ്റ് 6 പേര്‍ക്കൊപ്പം രാഘവ് ഛദ്ദ പാര്‍ട്ടി വിട്ടത്.

Read Also: സണ്‍സ്‌ക്രീന്‍ മേക്കപ്പ് പ്രൊഡക്റ്റല്ല, മരുന്നാണ്, ദിവസം 2 നേരമെങ്കിലും ഉപയോഗിക്കണം: ഡോ. സൗമ്യ സരിന്റെ വാക്കുകള്‍ തള്ളരുത്

രാഘവ് ഛദ്ദയ്‌ക്കൊപ്പം സന്ദീപ് പഥകും അശോകമിത്തലും ബിജെപിയില്‍ ചേര്‍ന്നു. ബിജെപി ദേശീയ അധ്യക്ഷന്‍ നിതിന്‍ നബിന്‍ ഇവരെ പാര്‍ട്ടിലേക്ക് സ്വീകരിച്ചു.ഇവര്‍ക്ക് പുറമെ ഹര്‍ഭജന്‍ സിംഗ്, സ്വാതി മലിവാള്‍, രാജേന്ദ്ര ഗുപ്ത,വിക്രംജിത് സിംഗ് സാഹ്നി എന്നിവരും ഉടന്‍ ബിജെപിയില്‍ ചേരും. അതിനിടെ ബിജെപിയില്‍ ചേര്‍ന്ന 3 എംപിമാരെ അയോഗ്യരാക്കണമെന്ന് ആവശ്യപ്പെട്ട് ആം ആദ്മി പാര്‍ട്ടി ഉടന്‍ രാജ്യസഭാ അധ്യക്ഷന് കത്ത് നല്‍കും.നടന്നത് ഓപ്പറേഷന്‍ താമരയെന്നും സഞ്ജയ് സിംഗ് ആരോപിച്ചു.

Story Highlights : AAP to submit letter to Rajya Sabha Chairman for disqualification of MPs joined BJP