സൈന്യത്തിനായി മഹീന്ദ്രയുടെ സ്പെഷ്യൽ ATV; ഥാർ റോക്‌സ് പ്ലാറ്റ്‌ഫോമിൽ നിന്നൊരു വിസ്മയം

സൈന്യത്തിനായി മഹീന്ദ്ര രൂപകല്പന ചെയ്ത സ്പെഷ്യൽ ATV (ഓൾ-ടെറൈൻ വെഹിക്കിൾ) പുറത്തിറക്കി. മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്ര, ഈ വാഹനം ഇന്ത്യയുടെ സുരക്ഷാ സേനയ്ക്കായി പ്രത്യേകം നിർമ്മിച്ചതാണെന്ന് പറഞ്ഞു. പരീക്ഷണങ്ങൾക്കായി വാഹനം ഇന്ത്യൻ സൈന്യത്തിന് കൈമാറുമെന്ന് അദേഹം പറഞ്ഞു. സാധാരണ ഉപയോക്താക്കൾക്കുവേണ്ടി ഒരുക്കിയിട്ടുള്ള ഘടകങ്ങളെല്ലാം നീക്കം ചെയ്താണ് എടിവി പുറത്തിറക്കുന്നത്. വാഹനത്തിന്റെ ചിത്രങ്ങൾ മഹീന്ദ്ര പുറത്തുവിട്ടിട്ടുണ്ട്.

ഥാർ റോക്‌സിനെ അടിസ്ഥാനമാക്കിയാണ് എടിവി നിർമ്മിച്ചതെങ്കിലും, പ്രതിരോധ ആവശ്യങ്ങൾക്കായി മഹീന്ദ്ര നിരവധി മാറ്റങ്ങൾ വരുത്തിയിട്ടുണ്ട്. പുറംഭാഗത്ത് തുടങ്ങി, മുൻവശത്ത് സ്റ്റാൻഡേർഡ് റോക്‌സിൽ നിന്നുള്ള എൽഇഡി ഹെഡ്‌ലാമ്പുകളും ആറ് സ്ലാറ്റഡ് ഗ്രില്ലും നിലനിർത്തിയിട്ടുണ്ട്. എന്നാൽ വെല്ലുവിളി നിറഞ്ഞ ഭൂപ്രദേശങ്ങളിൽ നിന്ന് വാഹനത്തെ പുറത്തുകൊണ്ടുവരാൻ വിഞ്ച് ഉള്ള ഒരു കട്ടിയുള്ള ബമ്പർ ഇതിലുണ്ട്. കാഠിന്യത്തിനായി വിൻഡ്‌ഷീൽഡിന് ഒരു മെറ്റൽ ട്യൂബ് വഴി അധിക സംരക്ഷണം ലഭിക്കുന്നു. കൂടാതെ ലൈറ്റിംഗ് മൗണ്ടുകളും ഉൾപ്പെടുന്നു.

സ്റ്റാൻഡേർഡ് വാതിലുകൾ മാറ്റി, മൊത്തത്തിലുള്ള ഭാരം കുറയ്ക്കുകയും, എളുപ്പത്തിൽ അകത്തേക്കും പുറത്തേക്കും പ്രവേശിക്കാൻ കഴിയുന്ന ട്യൂബുലാർ ഫ്രെയിമുകളാണ് ഉപയോഗിച്ചിരിക്കുന്നത്. മുകൾ ഭാ​ഗത്ത് ഒരു മോഡുലാർ റോൾ കേജ് സ്ഥാപിച്ചിരിക്കുന്നു. ഇത് 7.62mm കാലിബർ മീഡിയം മെഷീൻ ഗണ്ണിന് അനുയോജ്യമായ 360-ഡിഗ്രി ടററ്റ് ഘടിപ്പിക്കാനും ഉപയോഗിക്കാം. കൂടാതെ, ഉയർന്ന ഗ്രൗണ്ട് ക്ലിയറൻസുള്ള 18 ഇഞ്ച് ഓൾ-ടെറൈൻ ടയറുകളിലാണ് ATV ഓടുന്നത്.

ATV-യുടെ മെക്കാനിക്കൽ ഘടകങ്ങളെ സംരക്ഷിക്കുന്ന അണ്ടർബോഡി സംരക്ഷണവുമുണ്ട്. ടെയിൽഗേറ്റിൽ ഘടിപ്പിച്ചിരിക്കുന്നത് എക്സ്റ്റൻഡഡ് റേഞ്ചിനായി ഒരു ജെറിക്കൻ ഹോൾഡറും ഒരു ഡബിൾ സ്പെയർ-വീൽ കാരിയറും ആണ്. സൈനിക ഗിയർ സംഘടിപ്പിക്കുന്നതിനും സുരക്ഷിതമാക്കുന്നതിനുമായി പിൻ ഫെൻഡറിൽ MOLLE (മോഡുലാർ ലൈറ്റ്വെയ്റ്റ് ലോഡ്-കാരിയിംഗ് എക്യുപ്‌മെന്റ്) സംഭരണമുണ്ട്. എഞ്ചിൻ ഓപ്ഷനുകൾ അടക്കമുള്ളവയെക്കുറിച്ചുള്ള വിശദാംശങ്ങളൊന്നും മഹീന്ദ്ര പുറത്തുവിട്ടിട്ടില്ല.

Story Highlights : Mahindra unveils Thar Roxx-based ATV for Indian Army