രണ്ട് പതിറ്റാണ്ടിന് ശേഷം ആര്‍സനല്‍ ആദ്യമായി യുവേഫ ചാമ്പ്യന്‍സ് ലീഗ് ഫൈനലില്‍

ഇരുപത് വര്‍ഷം നീണ്ട കാത്തിരിപ്പിനൊടുവില്‍ ഇംഗ്ലീഷ് ക്ലബ്ബ് ആര്‍സനല്‍ യുവേഫ ചാമ്പ്യന്‍സ് ലീഗ് ഫൈനലില്‍. സ്വന്തം മൈതാനത്തെ രണ്ടാം പാദ സെമിയില്‍ സ്പാനിഷ് ക്ലബ്ബ് അത്ലറ്റിക്കോ മാഡ്രിഡിനെതിരെ നേടിയ എതിരില്ലാത്ത ഒരു ഗോളിന്റെ വിജയമാണ് ഗണ്ണേഴ്സിന് ഫൈനല്‍ ടിക്കറ്റ് സമ്മാനിച്ചത്. അത്ലറ്റിക്കോയുടെ മൈതാനത്ത് നടന്ന ആദ്യപാദ മത്സരം 1-1 ന്റെ സമനിലയില്‍ കലാശിച്ചിരുന്നു. ഇരുപാദങ്ങളിലുമായി 2-1 ന്റെ ജയം. 2006-ന് ശേഷം ഇതാദ്യമായാണ് ആഴ്സണല്‍ ചാമ്പ്യന്‍സ് ലീഗ് ഫൈനലിന് യോഗ്യത നേടുന്നത്. 44-ാം മിനിറ്റില്‍ ബുകായോ സാക്കയാണ് മത്സരത്തിലെ ഏക ഗോള്‍ നേടിയത്.

2016-ന് ശേഷം ആദ്യ ചാമ്പ്യന്‍സ് ലീഗ് ഫൈനല്‍ എന്ന മോഹത്താല്‍ എത്തിയ അത്ലറ്റിക്കോയ്ക്ക് എമിറേറ്റ്സ് മൈതാനത്ത് കാര്യമായ നീക്കങ്ങള്‍ നടത്താനായില്ല. വെറും ഒന്‍പത് ഷോട്ടുകള്‍ മാത്രമാണ് അത്ലറ്റിക്കോ താരങ്ങള്‍ക്ക് പോസ്റ്റിലേക്ക് തൊടുക്കാനായത്. അതില്‍ തന്നെ ലക്ഷ്യത്തിലേക്ക് തൊടുത്തത് ആകട്ടെ രണ്ടെണ്ണം മാത്രമായിരുന്നു. ജൂലിയന്‍ ആല്‍വാരസ്, അന്റോയ്ന്‍ ഗ്രീസ്മാന്‍, അഡെമോള ലൂക്ക്മാന്‍ എന്നിവരല്ലൊം കിണഞ്ഞ് പരിശ്രമിച്ചിട്ടും ഫലത്തിലേക്ക് എത്തുന്ന തരത്തിലുള്ള മുന്നേറ്റങ്ങളൊന്നും കാഴ്ച്ച വെക്കാനായില്ല. വ്യാഴാഴ്ച അര്‍ധരാത്രി നടക്കുന്ന പിഎസ്ജി-ബയേണ്‍ മ്യൂണിക്ക് രണ്ടാം സെമി ഫൈനല്‍ വിജയികളായിരിക്കും ഫൈനലില്‍ ആഴ്സണലിന്റെ എതിരാളികള്‍.

Story Highlights: Atletico Madrid vs Arsenal UEFA Champions League Semi-Final