ഇന്ത്യൻ ടി20 ക്യാപ്റ്റനായി സഞ്ജു സാംസണെ പരിഗണിക്കുന്നു; ഗംഭീറിന് താത്പര്യം സഞ്ജുവിനോടെന്ന് റിപ്പോർട്ട്

ഇന്ത്യൻ പ്രീമിയർ ലീഗിന്റെ 2026 സീസണിന് പിന്നാലെ ഇന്ത്യൻ ക്രിക്കറ്റ് ടീമിൽ വലിയ മാറ്റം വരുന്നു. ടി20 ടീമിൽ അടിമുടി മാറ്റം ഉണ്ടാകുമെന്നാണ് റിപ്പോർട്ട്. നായകസ്ഥാനത്തടക്കം അഴിച്ചപണി ഉണ്ടായേക്കുമെന്നാണ് പുറത്തുവരുന്ന വിവരം. നിലവിലെ ഇന്ത്യയുടെ ടി20 ടീമിന്റെ നായകൻ സൂര്യകുമാര്‍ യാദവിനെ ക്യാപ്റ്റന്‍ സ്ഥാനത്തുനിന്ന് മാറ്റാന്‍ സാധ്യതയുണ്ടെന്ന് ബിസിസിഐ വൃത്തങ്ങളെ ഉദ്ധരിച്ച് ടൈംസ് ഓഫ് ഇന്ത്യ റിപ്പോര്‍ട്ട് ചെയ്തു.

സൂര്യകുമാർ യാദവിനെ മാറ്റി ഇന്ത്യയുടെ അടുത്ത ടി20 ക്യാപ്റ്റനായി ശ്രേയസ് അയ്യരെ കൊണ്ടുവരാൻ അജിത് അഗാർക്കർ നയിക്കുന്ന സെലക്ഷൻ കമ്മിറ്റി ലക്ഷ്യമിടുന്നതായി കഴിഞ്ഞ ദിവസം റിപ്പോർട്ടുകൾ വന്നിരുന്നു. എന്നാൽ സഞ്ജു സാംസണെയാണ് നായകസ്ഥാനത്തേക്ക് മാനേജ്മെന്റ് പ്രധാനമായും പരിഗണിക്കുന്നത് എന്നാണ് ഇപ്പോൾ പുറത്തുവരുന്ന സൂചനകൾ. കോച്ച് ഗൗതം ഗംഭീറിന് താത്പര്യം സഞ്ജുവിനോടെന്നാണ് റിപ്പോർട്ടുകൾ.

ശ്രേയസ് അയ്യർ ആഭ്യന്തര ക്രിക്കറ്റിലും ഐപിഎല്ലിലും സ്ഥിരത പുലർത്തുന്നുണ്ടെങ്കിലും ഇന്ത്യയുടെ ടി20 ടീമിന് പുറത്താണ് ഇപ്പോഴും ശ്രേയസ്. എന്നാൽ സമീപകാലത്തെ സ്ഥിരതയാർന്ന പ്രകടനവും സഞ്ജുവിന് ഗുണകരമാകുന്നു. നിരവധി പ്രതിസന്ധികൾക്കും പരാജയങ്ങൾക്കും ശേഷമാണ് സഞ്ജു ടീമിലെ തന്റെ സ്ഥാനം ഉറപ്പിച്ചതും ഇപ്പോൾ ഇന്ത്യൻ ക്യാപ്റ്റൻ സ്ഥാനത്തേക്ക് പരിഗണിക്കപ്പെടും വിധം വളർന്നതും. ബാറ്റിംഗിലെ പ്രകടനം മങ്ങിയതാണ് സൂര്യയ്ക്ക് തിരിച്ചടിയായത്.

ഇന്ത്യൻ കുപ്പായത്തിൽ ബാറ്റിംഗിൽ പരാജയപ്പെടുന്ന സൂര്യകുമാറിന് ഐപിഎൽ 2026ലും ആ ഫോം വീണ്ടെടുക്കാൻ കഴിഞ്ഞിട്ടില്ല. നിലവിൽ ഇന്ത്യയുടെ ടി20 ടീമിലെ ഒന്നാം നമ്പർ വിക്കറ്റ് കീപ്പർ ബാറ്ററാണ് സഞ്ജു. വരാനിരിക്കുന്ന പുതിയൊരു ടീമിനെ കെട്ടിപ്പടുക്കാൻ അനുയോജ്യനായ താരം സഞ്ജുവാണെന്നാണ് വിലയിരുത്തപ്പെടുന്നത്.

Story Highlights : sanju samson to replace suryakumar yadav as t20 captain