പയ്യന്നൂരിൽ പാർട്ടി യോഗത്തിനിടെ ഏരിയ കമ്മിറ്റിയംഗമായ വനിതാ നേതാവിനെ അധിക്ഷേപിച്ചതായി പരാതി; നേതൃത്വത്തിന് പരാതി നൽകി

കണ്ണൂർ പയ്യന്നൂരിൽ സിപിഐഎം ലോക്കൽ കമ്മിറ്റി അംഗത്തിനെതിരെ നേത്യത്വത്തിന് പരാതി നൽകി ഏരിയ കമ്മിറ്റി അംഗം. നോർത്ത് ലോക്കൽ കമ്മിറ്റി അംഗമായ സഞ്ജീവൻ യോഗത്തിൽ അശ്ലീല ചുവയോടെ സംസാരിച്ചുവെന്നാണ് പരാതി. കഴിഞ്ഞ ദിവസം നടന്ന ലോക്കൽ കമ്മിറ്റി യോഗത്തിലാണ് സംഭവം.

ഏരിയ കമ്മിറ്റി അംഗം കൂടിയായ കെ പി ജ്യോതിക്കെതിരെയാണ് ലോക്കൽ കമ്മിറ്റി അംഗം മോശം പരാമർശം നടത്തിയത്. സിപിഎം കണ്ണൂർ ജില്ലാ സെക്രട്ടറി കെ.കെ. രാഗേഷിന്റെ സാന്നിധ്യത്തിലായിരുന്നു യോഗം. മുതിർന്ന നേതാക്കളുടെ സാന്നിധ്യത്തിൽ നടന്ന യോഗത്തിലെ അധിക്ഷേപത്തിനെതിരെ വനിതാ നേതാവ് പാർട്ടി ജില്ലാ-സംസ്ഥാന നേതൃത്വങ്ങൾക്ക് രേഖാമൂലം പരാതി നൽകി. തിരഞ്ഞെടുപ്പ് തോൽവിയുമായി ബന്ധപ്പെട്ടായിരുന്നു യോഗം നടത്തിയിരുന്നത്.

വോട്ട് മറിക്കൽ ആരോപണത്തെച്ചൊല്ലി ഇരുവർക്കുമിടയിൽ കടുത്ത വാക്കേറ്റം ഉണ്ടാകുകയും, തുടർന്ന് ലോക്കൽ കമ്മിറ്റി അംഗം വനിതാ നേതാവിനെ വ്യക്തിപരമായി അധിക്ഷേപിക്കുന്ന രീതിയിലേക്ക് കാര്യങ്ങൾ മാറുകയും ചെയ്തുവെന്നാണ് വിവരം. അതാത് ഘടകങ്ങൾക്ക് ഇതുമായി ബന്ധപ്പെട്ട് പരാതി നൽകിയിട്ടുണ്ട്. പയ്യന്നൂരിലെ ഈ സംഭവം പരിഹാസരൂപേണ സോഷ്യൽ മീഡിയയിൽ പ്രചരിക്കുന്നുമുണ്ട്.

Story Highlights : A complaint was filed against a woman leader, who is a member of the area committee, for insulting her during a party meeting in Payyanur