ദിലീപിനെ പുറത്ത് പോകാൻ അനുവദിക്കരുതെന്ന് പ്രോസിക്യൂഷൻ

നടിയെ ആക്രമിച്ച കേസിൽ പ്രതിയായ ദിലീപ് ജയിലിൽനിന്ന് പുറത്തുപോകാൻ അനുമതി തേടി കോടതിയിൽ നൽകിയ അപേക്ഷയെ എതിർത്ത് പ്രോസിക്യൂഷൻ. ദിലീപിനെ പുറത്ത് പോകാൻ അനുവദിക്കരുതെന്ന് പ്രോസിക്യൂഷൻ കോടതിയെ അറിയിച്ചു.

ഈ മാസം ആറാം തീയ്യതി അച്ഛൻറെ ശ്രാദ്ധത്തിൽ പങ്കെടുക്കാൻ ജയിലിൽ നിന്ന് പുറത്ത് പോകാൻ അനുവദിക്കണമെന്നാണ് ദിലീപിന്റെ അപേക്ഷ.

സെപ്തംബർ ആറിന് രാവിലെ 7 മുതൽ 11വരെ വീട്ടിൽ പോകാൻ അനുവദിക്കണമെന്നാണ് ദിലീപ് ആവശ്യപ്പെട്ടിരിക്കുന്നത്. അങ്കമാലി മജിസ്‌ട്രേറ്റ് കോടതിലാണ് അപേക്ഷ നൽകിയത്. ഇത് ഇന്ന് പരിഗണിക്കും.

അതേസമയം ദിലീപിന്‍റെ റിമാൻഡ് കാലാവധി ഈ മാസം 16 വരെ നീട്ടി. വീഡിയോ കോണ്‍ഫറൻസിംഗ് വഴിയാണ് ദിലീപിനെ കോടതി മുന്പാകെ ഹാജരാക്കിയത്. അങ്കമാലി മജിസ്ട്രേറ്റ് കോടതിയാണ് റിമാൻഡ് നീട്ടിയത്.