വൈദികര്‍ക്കെതിരായ ലൈംഗിക ആരോപണം; കുറ്റക്കാരെ രക്ഷിക്കില്ലെന്ന് ഓര്‍ത്തഡോക്‌സ് സഭ

സഭയിലെ വൈദീകര്‍ക്കെതിരേ ഉയര്‍ന്ന ലൈംഗിക പീഡന ആരോപണത്തില്‍ അന്വേഷണം നടന്നുവരുകയാണെന്ന് ഓര്‍ത്തഡോക്‌സ് സഭ. കുറ്റക്കാരായ ആരേയും രക്ഷപെടാന്‍ അനുവദിക്കില്ലെന്നും നിരപരാധികളെ കുറ്റക്കാരാക്കില്ലെന്നും സഭ പത്രക്കുറിപ്പില്‍ വ്യക്തമാക്കി. കുറ്റം തെളിഞ്ഞാല്‍ ഉചിതമായ ശിക്ഷാനടപടികള്‍ എടുക്കുമെന്ന് സഭാ നേതൃത്വം അറിയിച്ചു. മൂല്യങ്ങള്‍ക്ക് അനുസൃതമായി ജീവിക്കാന്‍ വൈദികരെ പ്രേരിപ്പിക്കുമെന്നും സഭ അറിയിച്ചു. മലങ്കര ഓര്‍ത്തഡോക്‌സ് സഭയിലെ അഞ്ച് വൈദികര്‍ക്കെതിരേയാണ് ലൈംഗികപീഡന ആരോപണമുയര്‍ന്നിരിക്കുന്നത്. തിരുവല്ല സ്വദേശിയായ യുവതിയെ വൈദികര്‍ പീഡിപ്പിച്ചുവെന്ന് ആരോപിച്ച് യുവതിയുടെ ഭര്‍ത്താവാണ് സഭാ അധികൃതര്‍ക്ക് പരാതി നല്‍കിയത്.