യുവാവിന്റെ ജഡം ബൈക്കിൽ കെട്ടി പാറക്കുളത്തിൽ താഴ്ത്തിയ നിലയിൽ

കോട്ടയം വാഴൂരിൽ യുവാവിന്റെ ജഡം ബൈക്കിൽ കെട്ടി പാറക്കുളത്തിൽ താഴ്ത്തിയ നിലയിൽ കണ്ടെത്തി. ആലപ്പുഴ കൈനടി സ്വദേശി മുകേഷിന്റെ മൃതദേഹമാണ് കണ്ടെത്തിയത്. രാവിലെ പത്തു മണിയോടെയാണ് തലയുടെ ഭാഗം വെള്ളത്തിൽ നിന്നു ഉയർന്നു നിൽക്കുന്നതു കണ്ട് നാട്ടുകാർ കറുകച്ചാൽ പൊലീസിൽ വിവരമറിയിച്ചത്. ബൈക്കിനോട് ചേർത്ത് ചരട് ഉപയോഗിച്ച് ബന്ധിപ്പിച്ച നിലയിലായിരുന്നു മൃതദേഹം. മൃതദേഹത്തിൽ നിന്നും ലഭിച്ച തിരിച്ചറിയൽ രേഖയിൽ നിന്നുമാണ് മരിച്ചത് കൈനടി സ്വദേശി മുകേഷാണെന്ന് വ്യക്തമായത്. സംഭവത്തിൽ ദുരൂഹതയുണ്ടെന്നാണ് പ്രാഥമിക നിഗമനം. ഡിസംബർ 27 മുതൽ തടിപ്പണിക്കാരനായ മുകേഷിനെ കാണാനില്ലെന്ന് കാണിച്ച് ബന്ധുക്കൾ കൈനടി പൊലീസിൽ പരാതി നൽകിയിരുന്നു.