പൊതുവിദ്യാലയങ്ങളിലേക്ക് എത്തിയത് രണ്ടരലക്ഷം വിദ്യാര്‍ത്ഥികള്‍; അഭിമാന നേട്ടമെന്ന് ധനമന്ത്രി

സംസ്ഥാനത്തെ പൊതുവിദ്യാലയങ്ങളിലേക്ക് രണ്ടരലക്ഷം വിദ്യാര്‍ത്ഥികള്‍ എത്തിയെന്ന് ധനമന്ത്രി തോമസ് ഐസക്. ഇതില്‍ 94 ശതമാനം കുട്ടികളും മറ്റ് വിദ്യാലയങ്ങളില്‍ നിന്ന് ടിസി വാങ്ങി സര്‍ക്കാര്‍ സ്‌കൂളിലേക്ക് എത്തിയതാണെന്നും മന്ത്രി ബജറ്റ് അവതരണത്തിനിടെ കൂട്ടിച്ചേര്‍ത്തു. ഇതിനെ സര്‍ക്കാരിന്റെ അഭിമാന നേട്ടമായാണ് മന്ത്രി അവതരിപ്പിച്ചത്.

പൊതുവിദ്യാഭ്യാസ യജ്ഞം വന്‍ വിജയമാണെന്നാണ് ഇത് അര്‍ത്ഥമാക്കുന്നത്. വിദ്യാഭ്യാസ മേഖലയ്ക്കായി കിഫ്ബിയില്‍ നിന്ന് 2038 കോടി രൂപ അനുവദിച്ചു. സ്‌കൂളുകളുടെ അടിസ്ഥാന സൗകര്യത്തിനായി 170 കോടി. എട്ട് മുതല്‍ 12 വരെയുള്ള 4775 സ്‌കൂളുകള്‍ ഹൈടെക് ആയി ഉയര്‍ത്തും. അതിനായി 292 കോടി ബജറ്റില്‍ അനുവദിച്ചു. സ്ഥലമില്ലാത്ത സ്‌കൂളുകള്‍ക്ക് അനിവാര്യമായ ഭൂമി വാങ്ങുന്നതിന് സഹായം. വിദ്യാഭ്യാസ മേഖലയില്‍ 3655 തസ്തികകള്‍ സര്‍ക്കാര്‍ സൃഷ്ടിച്ചു. അക്കാദമിക് നിലവാരം ഉയര്‍ത്തുന്നതിന്റെ ഭാഗമായി അധ്യാപകര്‍ക്ക് പ്രത്യേക പരിശീലന പരിപാടികള്‍ ഒരുക്കുമെന്നും മന്ത്രി ബജറ്റ് അവതരണത്തില്‍ കൂട്ടിച്ചേര്‍ത്തു.