കോൺഗ്രസിനെ പച്ച വൈറസ് ബാധിച്ചു; വിവാദ പരാമർശവുമായി വീണ്ടും ആദിത്യനാഥ്
കോണ്ഗ്രസിനെതിരെ വിവാദ പരാമർശവുമായി വീണ്ടും ഉത്തർപ്രദേശ് മുഖ്യമന്ത്രി യോഗി ആദിത്യനാഥ്. കോണ്‍ഗ്രസിനെ ഗ്രീൻ വൈറസ് ബാധിച്ചുവെന്നായിരുന്നു യോഗിയുടെ പരാമർശം. ബറേലിയിൽ നടന്ന തെരഞ്ഞെടുപ്പ് റാലിക്കിടെയായിരുന്നു മുസ്ലിം ലീഗുമായുള്ള കോൺഗ്രസിൻ്റെ ബന്ധത്തെ പരോക്ഷമായി വിമർശിച്ച് ആദിത്യനാഥ് രംഗത്തെത്തിയത്.
കോണ്‍ഗ്രസ് അധ്യക്ഷൻ രാഹുൽ ഗാന്ധി വയനാട്ടിൽ നാമനിർദേശ പത്രിക സമർപ്പിക്കാൻ എത്തിയപ്പോൾ അദ്ദേഹത്തിന് ചുറ്റും പച്ചക്കൊടി മാത്രമാണ് കാണാനുണ്ടായിരുന്നതെന്നും യോഗി പറഞ്ഞു. മുൻ പ്രധാനമന്ത്രി മൻമോഹൻ സിംഗിനെയും അദ്ദേഹം കുറ്റപ്പെടുത്തി. രാജ്യത്തെ വിഭവങ്ങളുടെ ഉപഭോക്താവ് മുസ്‌ലിങ്ങളാണെന്ന് മൻമോഹൻ സിംഗ് മുൻപൊരിക്കൽ പറഞ്ഞുവെന്നും യോഗി കൂട്ടിച്ചേർത്തു.
മുസ്ലിം ലീഗ് വൈറസാണെന്നും കോണ്‍ഗ്രസിനെ അത് ബാധിച്ചിരിക്കുകയാണെന്നും വയനാട്ടില്‍ കോണ്‍ഗ്രസ് ജയിച്ചാല്‍ വൈറസ് രാജ്യം മുഴുവന്‍ വ്യാപിക്കുമെന്ന് യോഗി ആദിത്യനാഥ് നേരത്തെ പറഞ്ഞിരുന്നു. ഇതിനെതിരേ വിവിധ പാർട്ടിയിലെ ദേശീയ നേതാക്കൾ രംഗത്തു വന്നിരുന്നു.
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
