വിമാനാപകടത്തിൽ കൊല്ലപ്പെട്ട ഫുട്ബോളർ എമിലിയാനോ സലായുടെ പിതാവ് അന്തരിച്ചു

ജനുവരിയിൽ വിമാനാപകടത്തിൽ കൊല്ലപ്പെട്ട ഫുട്ബോളർ എമിലിയാനോ സലായുടെ പിതാവ് ഹൊറാസിയോ സലാ മരണപ്പെട്ടു. സലാ ലോകത്തോട് വിട പറഞ്ഞ് മാസങ്ങൾ ആകും മുമ്പാണ് പിതാവും മരണപ്പെട്ടത്. ഹൃദയാഘാതമാണ് മരണ കാരണം. സലായുടെ മരണ ശേഷം അതീവ ദുഖത്തിലൂടെ ആയിരുന്നു ഹൊറാസിയോ കടന്നു പോയത് എന്ന് സുഹൃത്തുക്കൾ പറഞ്ഞിരുന്നു. വീട്ടിൽ വെച്ചായിരുന്നു 58കാരനായ ഹൊറാസിയോ സലായുടെ മരണം.

കഴിഞ്ഞ ജനുവരിൽ തന്റെ കരാർ പൂർത്തിയാക്കാനായി കാർഡിഫിലേക്ക് പോകും വഴി ആയിരുന്നു സലായുടെ വിമാനം അപകടത്തിൽ പെട്ടത്. നാന്റെസ് ക്ലബിന്റെ താരമായിരുന്നു സലാ. താരവും പൈലറ്റും ആണ് വിമാനത്തിൽ ഉണ്ടായിരുന്നത്. രണ്ടാഴ്ചയോളം നീണ്ട തിരച്ചിലിന് ശേഷമാണ് മൃതദേഹങ്ങൾ കണ്ടെടുത്തത്.