പതിനൊന്നുകാരിയെ പീഡിപ്പിച്ച കേസിൽ തമിഴ്‌നാട് സ്വദേശി അറസ്റ്റിൽ

മലപ്പുറം എടക്കരയിൽ പതിനൊന്നുകാരിയെ പീഡിപ്പിച്ച കേസിൽ തമിഴ്‌നാട് സ്വദേശി അറസ്റ്റിൽ. നീലഗിരി ഉപ്പട്ടി ചേലക്കുന്ന് സൈമൺ എന്ന ബേബിയെയാണ് (52) പോത്തുകൽ പൊലീസ് അറസ്റ്റ് ചെയ്തത്. പോത്തുകൽ സ്റ്റേഷൻ പരിധിയിലാണ് സംഭവം. ഹോസ്റ്റലിൽ താമസിച്ച് പഠിക്കുന്ന പെൺകുട്ടി പിതാവിനൊപ്പം അവധിക്കാലം ചിലവഴിക്കാനെത്തിയതായിരുന്നു.

പെൺകുട്ടിയുടെ പിതാവുമൊത്ത് മദ്യപിക്കാനെത്തിയിരുന്ന പ്രതി പിതാവ് പുറത്തുപോകുന്ന വേളയിൽ കുട്ടിയെ ലൈംഗികമായി ഉപദ്രവിക്കുകയായിരുന്നുവെന്നാണ് പരാതി. ഒന്നിൽ കൂടുതൽ തവണ പെൺകുട്ടി പീഡനത്തിനിരയായതായാണ് പൊലീസ് അന്വേഷണത്തിൽ വ്യക്തമായത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.