പുനലൂരിൽ സ്‌കൂൾ ബസ് മതിലിൽ ഇടിച്ച് അപകടം; വിദ്യാർത്ഥികൾക്ക് പരിക്ക്

പുനലൂർ ബോയ്‌സ് ഹയർ സെക്കൻഡറി സ്‌കൂളിലെ ബസ് നിയന്ത്രണം വിട്ട് മതിലിൽ ഇടിച്ച് അപകടം. വിളക്കുടി ധർമ്മശാസ്താ ക്ഷേത്ര മതിൽ തകർത്ത് ക്ഷേത്രവളപ്പിലേക്ക് കയറിയ ബസ് തൂണിൽ ഇടിച്ചാണ് നിന്നത്. ബസിലുണ്ടായിരുന്ന വിദ്യാർത്ഥികളും ക്ലീനറും നിസാര പരിക്കുകളോടെ രക്ഷപ്പെട്ടു.

ശബ്ദം കേട്ട് ഓടിയെത്തിയ നാട്ടുകാരാണ് രക്ഷാപ്രവർത്തനം നടത്തിയത്. അപകടത്തിൽ സ്‌കൂൾ ബസിന്റെ മുൻഭാഗം മുഴുവനായും തകർന്നു. ക്യാബിനുള്ളിൽ കുടുങ്ങിയ ക്ലീനറെ ഫയർഫോഴ്‌സെത്തിയാണ് പുറത്തെടുത്തത്. പരിക്കേറ്റവരെ പുനലൂർ താലൂക്ക് ആശുപത്രിയിൽ പ്രവേശിപ്പിച്ചിട്ടുണ്ട്.