കർണാടകയിൽ കരുനീക്കങ്ങളുമായി ബിജെപി; 105 എംഎൽഎമാരുമായി യെദ്യൂരപ്പ നാളെ ഗവർണറെ കാണും
ഭരണപക്ഷത്തെ എംഎൽഎമാരുടെ കൂട്ടരാജിയെ തുടർന്ന് കർണാടകയിൽ രാഷ്ട്രീയ പ്രതിസന്ധി തുടരുന്നതിനിടെ പുതിയ നീക്കങ്ങളുമായി ബിജെപി. യെദ്യൂരപ്പയുടെ നേതൃത്വത്തിൽ 105 എംഎൽഎമാർ നാളെ ഗവർണറെ കാണും. വിമത എംഎൽഎമാരുടെ രാജി സ്വീകരിക്കാൻ വൈകുന്നതിൽ സ്പീക്കർക്കെതിരെ പ്രതിഷേധ പരിപാടികൾ സംഘടിപ്പിക്കാനും ബിജെപി നിയമസഭാ കക്ഷിയോഗം തീരുമാനിച്ചിട്ടുണ്ട്.
ഇതിന്റെ ഭാഗമായി നാളെ മുഴുവൻ ബിജെപി എംഎൽഎമാരും നിയമസഭയ്ക്ക് മുന്നിൽ പ്രതിഷേധിക്കും. അതേ സമയം കർണാടകയിൽ കോൺഗ്രസ് ഇനിയും പ്രതീക്ഷ കൈവിട്ടിട്ടില്ല. വിമത എംഎൽഎമാരെ അനുനയിപ്പിക്കുന്നതിനായി മുതിർന്ന നേതാവും മന്ത്രിയുമായ ഡി.കെ ശിവകുമാർ നാളെ മുംബൈയ്ക്ക് പോകാൻ തീരുമാനിച്ചിട്ടുണ്ട്.
എഐസിസി നിർദേശ പ്രകാരം മുതിർന്ന കോൺഗ്രസ് നേതാവ് ഗുലാം നബി ആസാദ് ബംഗളുരുവിലെത്തി. എട്ട് എംഎൽഎമാരുടെ രാജി നിയമപരമല്ലെന്നും ഇവർ നേരിട്ട് വരണമെന്നും സ്പീക്കർ കെ.ആർ രമേഷ് കുമാർ നേരത്തെ അറിയിച്ചിരുന്നു. ഭൂരിപക്ഷം നഷ്ടമായ സാഹചര്യത്തിൽ മുഖ്യമന്ത്രി എച്ച്.ഡി കുമാരസ്വാമി രാജി വയ്ക്കണമെന്ന് ബിജെപി ആവശ്യപ്പെട്ടിട്ടുണ്ട്.
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
