ഉത്രാടപ്പാച്ചിലിൽ വടക്കൻ കേരളം

പ്രളയത്തെയും പ്രകൃതി ദുരന്തത്തെയും അതിജീവിച്ച മലയാളികൾ ഇന്ന് ഓണം ആഘോഷിക്കാൻ ഉള്ള ഉത്രാടപ്പാച്ചിലിലാണ്. നാടും നഗരവുമെന്ന് വ്യത്യാസമില്ലാതെ ആളുകൾ ഓണാഘോഷത്തിനുള്ള അവസാനവട്ട ഒരുക്കത്തിലാണ്.

രാവിലെ മുതൽ തന്നെ മലബാറിലെ നഗരങ്ങളെല്ലാം ഓണ തിരക്കിലേക്ക് ഉണർന്നു. കോഴിക്കോട് നഗരത്തിലെ മിഠായി തെരുവും പാളയത്തുമെല്ലാം തിരക്കേറി. കോഴിക്കോട് പലയിടത്തും ചെറിയ തോതിൽ മഴയുണ്ടെങ്കിലും ഉത്രാടപ്പാച്ചിലിനെ ഇതൊന്നും ബാധിച്ചില്ല. പ്രളയവും കാലാവസ്ഥ പ്രതികൂലമായത്തും വിപണിയെ ബാധിച്ചതായി കച്ചവടക്കാർ പറയുന്നു.

തിരുവോണദിവസം ആഘോഷിക്കാൻ വസ്ത്രങ്ങളും പൂക്കളും വാങ്ങാനുള്ള അവസാനവട്ട തിരക്കിലാണ് ജനങ്ങൾ.  വൈകിട്ടോടെ നഗരത്തിലെ കച്ചവട കേന്ദ്രങ്ങളിലെല്ലാം തിരക്ക് വർധിച്ചു. നഗരത്തിൽ ഗതാഗത നിയന്ത്രണം ട്രാഫിക് പൊലീസ് ഏർപ്പെടുത്തിയെങ്കിലും ഉത്രാടപ്പാച്ചിലിന്റെ തിരക്കിൽ നഗരം വീർപ്പുമുട്ടി . അതേസമയം പ്രളയം ബാധിച്ചത് കാരണം സാധാരണ നിലയിൽ കാണുന്ന തിരക്ക് പോലും മലപ്പുറം നഗരത്തിൽ കാണാനില്ല.