ഉപതെരഞ്ഞെടുപ്പിലെ തിരിച്ചടി; സിദ്ധരാമയ്യ പ്രതിപക്ഷ നേതൃസ്ഥാനം രാജിവച്ചു

കര്‍ണാടക നിയമസഭ ഉപതെരഞ്ഞെടുപ്പില്‍ തിരിച്ചടിയേറ്റതിനെ തുടര്‍ന്ന് സിദ്ധരാമയ്യ കോണ്‍ഗ്രസ് നിയമസഭ കക്ഷി നേതൃസ്ഥാനവും പ്രതിപക്ഷ നേതൃസ്ഥാനവും രാജിവച്ചു. രാജിക്കാര്യം പാര്‍ട്ടി അധ്യക്ഷ സോണിയ ഗാന്ധിയെ അറിയിച്ചതായും സിദ്ധരാമയ്യ വ്യക്തമാക്കി. കോണ്‍ഗ്രസിന്റെ തെരഞ്ഞെടുപ്പ് പ്രചാരണങ്ങള്‍ക്ക് നേതൃത്വം വഹിച്ചിരുന്നത് സിദ്ധരാമയ്യയായിരുന്നു.

ജനങ്ങളുടെ തീരുമാനം അംഗീകരിക്കുന്നു. പ്രതിപക്ഷ നേതാവ് എന്ന നിലയില്‍ ജനാധിപത്യ മൂല്യങ്ങള്‍ ഉയര്‍ത്തിപ്പിടിക്കണം. രാജിക്കത്ത് സോണിയ ഗാന്ധിക്ക് അയച്ചിട്ടുണ്ടെന്നും അദ്ദേഹം പറഞ്ഞു. കര്‍ണാടകയില്‍ ഉപതെരഞ്ഞെടുപ്പ് നടന്ന 15 സീറ്റുകളില്‍ 12 ലും ബിജെപി ജയിച്ചു. കോണ്‍ഗ്രസിന് രണ്ട് സീറ്റുകളാണ് നേടാനായത്. ഭരണം തുടരാന്‍ ബിജെപിക്ക് വേണ്ടത് ആറ് സീറ്റുകളായിരുന്നു. ഈ സാഹചര്യത്തിലാണ് 12 സീറ്റുകളെന്ന നേട്ടം.