കൊവിഡ് സ്ഥിരീകരിച്ച പോത്തൻകോട് സ്വദേശി വിവാഹത്തിനും മരണാനന്തര ചടങ്ങിലും പങ്കെടുത്തു

കൊവിഡ് സ്ഥിരീകരിച്ച തിരുവനന്തപുരം പോത്തൻകോട് സ്വദേശിക്ക് രോഗം എങ്ങനെ വന്നുവെന്ന് വ്യക്തമല്ല. രോഗ ബാധിതൻ ചെന്നൈ സ്വദേശികൾ പങ്കെടുത്ത രണ്ട് മരണാനന്തര ചടങ്ങിൽ പങ്കെടുത്തിരുന്നു. ഒരു വിവാഹ ചടങ്ങിലും പങ്കെടുത്തു. മന്ത്രി കടകംപള്ളി സുരേന്ദ്രനാണ് ഇക്കാര്യം അറിയിച്ചത്.

പോത്തൻകോട് സ്വദേശിയായ 68കാരനാണ് കൊവിഡ് സ്ഥിരീകരിച്ചിരിക്കുന്നത്. ഇദ്ദേഹത്തിന്റെ നില ഗുരുതരമാണെന്നാണ് വിവരം. നിലവിൽ തിരുവനന്തപുരം മെഡിക്കൽ കോളജിലാണ് ഇദ്ദേഹം ചികിത്സയിൽ കഴിയുന്നത്. 68കാരന്റെ കാര്യത്തിൽ ആശങ്കയുണ്ടെന്ന് ആരോഗ്യവകുപ്പ് അധികൃതർ പറഞ്ഞിരുന്നു.

അതേസമയം, കേരളത്തിൽ കൊവിഡ് രോഗ ബാധിതരുടെ എണ്ണം 200 കടന്നു. ഇന്നലെ കേരളത്തിൽ 20 പേർക്കാണ് രോഗം സ്ഥിരീകരിച്ചത്. കാസർഗോഡാണ് ഏറ്റവും അധികം രോഗബാധിതർ ഉള്ളത്. കാസർഗോഡും തിരുവനന്തപുരത്തും അതീവ ജാഗ്രതാ നിർദേശമാണ് ആരോഗ്യവകുപ്പ് പുറപ്പെടുവിച്ചിരിക്കുന്നത്.