കൊവിഡ് 19: കണ്ണൂരില്‍ ആദ്യമായി സമ്പർക്കത്തിലൂടെ ഒരാൾക്ക് വൈറസ് ബാധ സ്ഥിരീകരിച്ചു

കണ്ണൂരില്‍ ആദ്യമായി സമ്പർക്കത്തിലൂടെ ഒരാൾക്ക് കൊവിഡ് 19 രോഗം ബാധിച്ചു. രോഗം സ്ഥിരീകരിച്ച എൺപത്തിയൊന്നുകാരൻ്റെ നില ഗുരുതരമായി തുടരുന്നു. ജില്ലയിൽ ചികിത്സയിലുണ്ടായിരുന്നവരിൽ നാല് പേർ കൂടി ആശുപത്രി വിട്ടു.

ചെറുവാഞ്ചേരി സ്വദേശിക്കാണ് കണ്ണൂരിൽ പുതുതായി കൊവിഡ് 19 രോഗം സ്ഥിരീകരിച്ചത്. എൺപത്തിയൊന്നുകാരനായ ഇയാൾക്ക് സമ്പർക്കത്തിലൂടെയാണ് രോഗം ബാധിച്ചത്. കഴിഞ്ഞ മാസം ഇയാളുടെ മകളും മകളുടെ മക്കളും ഗൾഫിൽ നിന്നും എത്തിയിരുന്നു. വീട്ടിൽ നിരീക്ഷണത്തിൽ കഴിയുന്ന ഇവർക്ക് ഇതുവരെ രോഗലക്ഷണങ്ങൾ ഉണ്ടായിട്ടില്ല. എന്നാൽ മൂന്ന് ദിവസം മുൻപ് പനിയും മറ്റുുമുണ്ടായതിനെ തുടർന്ന് എൺപത്തിയൊന്നുകാരൻ കണ്ണൂരിലെ ഒരു സ്വകാര്യ ആശുപത്രിയിൽ ചികിത്സ തേടി. തുടർന്ന് ഇയാളെ പരിയാരത്തെ കണ്ണൂർ ഗവ. മെഡിക്കൽ കോളജിലേക്ക് മാറ്റി. ശ്വാസകോശ സംബന്ധമായ രോഗങ്ങളും ഹൃദ്രോഗവുമുള്ള ഇയാളുടെ നില ഗുരുതരമായി തുടരുകയാണ്. ഇപ്പോൾ തീവ്രപരിചരണ വിഭാഗത്തിൽ ചികിത്സയിലാണ്. ഇയാളുടെ മകളുടെയും മകളുടെ മക്കളുടേയും സാംപിളുകൾ ഉടൻ പരിശോധനയ്ക്ക് അയക്കും. സമ്പര്‍ക്കം വഴി രോഗം ബാധിച്ച ജില്ലയിലെ ആദ്യ കേസാണിത്. ഇതുവരെ വിദേശത്ത് നിന്നെത്തിയവരില്‍ മാത്രമായിരുന്നു ജില്ലയില്‍ വൈറസ് ബാധ കണ്ടെത്തിയത്.

ഇതോടെ ജില്ലയില്‍ രോഗം ബാധിച്ചവരുടെ എണ്ണം 53 ആയി. ഇവരിൽ നാല് പേർ കൂടി ആശുപത്രി വിട്ടു. ഇതോടെ 19 പേർക്ക് കണ്ണൂരിൽ രോഗം ഭേദമായി. ജില്ലയില്‍ നിലവില്‍ 10430 പേരാണ് നിരീക്ഷണത്തില്‍ കഴിയുന്നത്. ഇതിൽ 87 പേർ ആശുപത്രികളിലാണുള്ളത്. 61 സാംപിളുകളുടെ ഫലം കൂടി ലഭിക്കാനുമുണ്ട്.

Story Highlights: one positive covid 19 case in kannur social contact