‘പടക്കം പൊട്ടിച്ചതിൽ എന്താണ് തെറ്റ്?’; ഐക്യദീപത്തിനിടെ പടക്കം പൊട്ടിച്ചതിനെ ന്യായീകരിച്ച് ബിജെപി നേതാവ്
പ്രധാനമന്ത്രിയുടെ ഐക്യദീപം തെളിയിക്കണമെന്ന ആഹ്വാനത്തിന്റെ പേരിൽ പടക്കംപൊട്ടിച്ച സംഭവത്തെ ന്യായീകരിച്ച് പശ്ചിമബംഗാൾ ബിജെപി അധ്യക്ഷൻ ദിലീപ് ഘോഷ്. പടക്കങ്ങൾ പൊട്ടിച്ചതിൽ തെറ്റില്ലെന്നും സന്തോഷപ്രകടനത്തിന്റെ ഭാഗം മാത്രമായി സംഭവത്തെ കണ്ടാൽ മതിയെന്നും ദിലീപ് ഘോഷ് പറഞ്ഞു.
കൊവിഡിനെ തുടർന്ന് രാജ്യത്ത് പ്രഖ്യാപിച്ചിരിക്കുന്ന ലോക്ക് ഡൗൺ കാരണം ആളുകൾ വളരെ പ്രതിസന്ധി നിറഞ്ഞ ഘട്ടത്തിലൂടെയാണ് കടന്നുപോകുന്നത്. ആരും അവരോട് പടക്കങ്ങൾ കത്തിക്കാൻ ആവശ്യപ്പെട്ടിട്ടില്ല. അവരങ്ങനെ ചെയ്തിട്ടുണ്ടെങ്കിൽ അതിൽ എന്താണ് അത്രമാത്രം തെറ്റുള്ളതെന്നും ഘോഷ് ചോദിച്ചു.
പ്രധാനമന്ത്രിയുടെ ആഹ്വാനം ഏറ്റെടുത്ത് ലോക്ക് ഡൗൺ നിയന്ത്രണങ്ങൾ ലംഘിച്ചുകൊണ്ട് നിരവധി പേർ പുറത്തിറങ്ങി പടക്കങ്ങൾ പൊട്ടിച്ചിരുന്നു. കൊൽക്കത്തയിൽ ലോക്ക് ഡൗൺ ലംഘിച്ചതിന്റെ പേരിൽ 98 പേർക്കെതിരെയാണ് പൊലീസ് കേസെടുത്തത്.
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
