കുണ്ടന്നൂർ മേൽപ്പാലത്തിന്റെ നിർമാണ പ്രവർത്തനങ്ങൾ പുനരാരംഭിച്ചു

ലോക്ക് ഡൗണിനെ തുടർന്ന് താത്കാലികമായി നിർത്തി വച്ചിരുന്ന കുണ്ടന്നൂർ മേൽപ്പാലത്തിന്റെ നിർമാണ പ്രവർത്തനങ്ങൾ പുനരാരംഭിച്ചു. കൊവിഡ് ജാഗ്രതാ നിർദേശങ്ങൾ പാലിച്ചാണ് നിർമാണം. മഴയ്ക്ക് മുമ്പ് പാലം പണി പൂർത്തിയാക്കേണ്ടതിനാൽ സർക്കാരിന്റെ പ്രേത്യേക അനുമതി പ്രകാരമാണ് നിർമാണ പ്രവർത്തനങ്ങൾ പുരോഗമിക്കുന്നത്.

ലോക്ക്ഡൗണിനെ തുടർന്ന് മാർച്ച് 21 മുതൽ നിർത്തിവച്ചിരിക്കുകയായിരുന്നു കുണ്ടന്നൂർ മേൽപ്പാലത്തിന്റെ നിർമാണം. കൊവിഡ് 19 പ്രതിരോധ പ്രവർത്തനങ്ങളുടെ ഭാഗമായി എല്ലാവിധ മുൻകരുതലുകളും എടുത്ത് നിർമാണ പ്രവർത്തനങ്ങൾ നടത്താനാണ് സർക്കാർ അനുമതി നൽകിയത്. സാമൂഹ്യ അകലവും സുരക്ഷയും ഉറപ്പാക്കി ഒരു മീറ്റർ അകലം പാലിച്ചും മാസ്‌ക് ധരിച്ചുമാണ് പ്രവർത്തനങ്ങൾ പുരോഗമിക്കുന്നത്.

നാൽപതോളം തൊഴിലാളികളാണ് നിലവിൽ നിർമാണ പ്രവർത്തനത്തിൽ ഏർപ്പെട്ടിരിക്കുന്നത്. അരൂർ ഭാഗത്തെ അനുബന്ധ റോഡിന്റെ ഫില്ലിംഗ്, മേൽത്തട്ടിലെ മിനുക്കു പണികൾ, പെയിന്റിങ് തുടങ്ങിയ പ്രവർത്തനങ്ങളാണ് പുരോഗമിക്കുന്നത്. നിലവിൽ പത്ത് ദിവസത്തേക്കുള്ള കല്ലും മെറ്റലും മാത്രമാണ് നിർമാണ പ്രവർത്തികൾ നടത്താൻ ബാക്കിയുള്ളത്. മാർച്ച് 24 ന് ശേഷം ഇളവുകൾ പ്രഖ്യാപിക്കുന്നതോടെ നിർമാണ വസ്തുക്കൾ ലഭ്യമാകുമെന്ന പ്രതീക്ഷയിലാണ് കരാറുകാർ. താത്കാലികമായി നിർത്തിവച്ചിരുന്ന വൈറ്റില മേൽപ്പാല നിർമാണവും കഴിഞ്ഞയാഴ്ച പുനരാരംഭിച്ചിരുന്നു.

Story Highlights- kundannoor over bridge