കോപ്പിയടിക്കായി ഓരോ വിഷയങ്ങൾക്കും പ്രത്യേക വാട്ട്‌സ് ആപ്പ് ഗ്രൂപ്പുകൾ; കൂട്ടകോപ്പിയടിയെ കുറിച്ച് കൂടുതൽ കണ്ടെത്തലുകൾ

സാങ്കേതിക സർവകലാശാലയിലെ കൂട്ടകോപ്പിയടിയെ കുറിച്ച് കൂടുതൽ കണ്ടെത്തലുകളുമായി സർവകലാശാല അധികൃതർ. നാല് കോളജുകളിൽ നിന്ന് പിടിച്ചെടുത്തത് 28 മൊബൈൽ ഫോണുകളാണ്.

ഓരോ വിഷയങ്ങൾക്കും പ്രത്യേക വാട്ട്‌സ് ആപ്പ് ഗ്രൂപ്പുകളും, സബ് ഗ്രൂപ്പുകളും ഉണ്ടാക്കിയായിരുന്നു കോപ്പിയടി. ക്രമക്കേട് നടന്ന കോളേജുകളിലെ പ്രിൻസിപ്പൽമാർ അടിയന്തിരമായി റിപ്പോർട്ട് നൽകണമെന്ന് സർവകലാശാല അധികൃതർ നിർദേശം നൽകി.

മുൻപ് റദ്ദാക്കിയ മൂന്നാം സെമസ്റ്റർ സപ്ലിമെന്ററി പരീക്ഷയാണ് കഴിഞ്ഞ ദിവസം നടന്നത്. ഈ പരീക്ഷയിലാണ് അഞ്ച് വിവിധ ജില്ലകളിലായി കൂട്ടകോപ്പിയടി നടന്നത്. പരീക്ഷ റദ്ദ് ചെയ്യുന്നതിനായി പരീക്ഷ കട്രോളർ വിസിയ്ക്ക് റിപ്പോർട്ട് നൽകിയതിന്റെ അടിസ്ഥാനത്തിലാണ് നടപടി. ഈ പരീക്ഷ നവംബർ അഞ്ചിന് വീണ്ടും നടത്തും.

Story Highlights – special whatsapp groups for copying in exam