കോഴിക്കോട് കാറിലെത്തിയ സംഘം തട്ടിക്കൊണ്ടുപോയ പ്രവാസി വ്യവസായിയെ മോചിപ്പിച്ചു

കോഴിക്കോട് നാദാപുരത്ത് കാറിലെത്തിയ സംഘം തട്ടിക്കൊണ്ടുപോയ പ്രവാസി വ്യവസായി എം.ടി.കെ.അഹമ്മദിനെ (53) മോചിപ്പിച്ചു. മോചനദ്രവ്യം നൽകിയതിനെ തുടർന്ന് തട്ടിക്കൊണ്ടുപോയവർ അഹമ്മദിനെ വടകരയിൽ എത്തിക്കുകയായിരുന്നു.

മുടവന്തേരിയിലെ മേക്കര താഴെ കുനി സ്വദേശിയായ അഹമ്മദിനെ ശനിയാഴ്ച പുലർച്ചെയാണ് കാറിലെത്തിയ സംഘം തട്ടിക്കൊണ്ടുപോയത്. വീടിന് സമീപത്തെ എണവള്ളൂർ പള്ളിയിൽ നമസ്‌കാരത്തിന് പോയ അഹമ്മദിനെ സ്‌കൂട്ടർ തടഞ്ഞ് കാറിലെത്തിയ സംഘം ബലമായി പിടിച്ചുകൊണ്ടുപോവുകയായിരുന്നു.
സ്‌കൂട്ടറും ധരിച്ചിരുന്ന തൊപ്പിയും റോഡിൽ ഉപേക്ഷിക്കപ്പെട്ട നിലയിൽ കണ്ടെത്തിയതിനെ തുടർന്ന് നടത്തിയ അന്വേഷണത്തിലാണ് സംഭവം പുറത്തറിഞ്ഞത്.