‘മുഖ്യധാരാ ബോളിവുഡിൻ്റെ മരിച്ച മുഖം’; ‘ദി കേരള സ്റ്റോറി’യെ പിന്തുണച്ച് രാം ഗോപാൽ വർമ

വിവാദ ചിത്രം ‘ദി കേരള സ്റ്റോറി’യെ പിന്തുണച്ച് സംവിധായകൻ രാം ഗോപാൽ വർമ. ദി കേരള സ്റ്റോറി മുന്നോട്ടുവെക്കുനത് മുഖ്യധാരാ ബോളിവുഡിൻ്റെ മരിച്ച മുഖമാണെന്ന് അദ്ദേഹം ട്വിറ്ററിൽ കുറിച്ചു. സുദീപ്തോ സെൻ സംവിധാനം ചെയ്ത ചിത്രം ഈ മാസം അഞ്ചിനാണ് രാജ്യവ്യാപകമായി റിലീസായത്.

‘മറ്റുള്ളവരോടും നമ്മളോടും കള്ളം പറയാൻ നമുക്ക് വളരെ അനായാസം കഴിയും. ആരെങ്കിലും മുന്നോട്ടുവന്ന് സത്യം വെളിപ്പെടുത്തുമ്പോൾ നമ്മൾ ഞെട്ടിപ്പോകും. കേരള സ്റ്റോറിയുടെ വിജയത്തിൽ ബോളിവുഡിൻ്റെ മരണം പോലുള്ള നിശബ്ദത ഇത് വിശദീകരിക്കുന്നതാണ്. മുഖ്യധാരാ ബോളിവുഡിൻ്റെ മരിച്ച മുഖത്തിൻ്റെ വൈരൂപ്യമാണ് കേരള സ്റ്റോറി എന്ന കണ്ണാടി കാണിക്കുന്നത്. ബോളിവുഡിലെ എല്ലാ ചർച്ചകളിലും എല്ലാ കോർപ്പറേറ്റ് ഹൗസിലും നിഗൂഢമായ മൂടൽമഞ്ഞ് പോലെ കേരള സ്റ്റോറി എന്നെന്നേക്കുമായി വേട്ടയാടും. കേരള സ്റ്റോറിയിൽ നിന്ന് പഠിക്കുക ബുദ്ധിമുട്ടാണ്. കാരണം നുണ പിന്തുടരാൻ എളുപ്പമാണ്. സത്യം പകർത്താനാണ് പാട്.’- രാം ഗോപാൽ വർമ ട്വീറ്റ് ചെയ്തു.

Story Highlights: Ram Gopal Varma Supports The Kerala Story