ഓഫ് റോഡിൽ പറപറക്കും; ടൊയോട്ട ലാൻഡ് ക്രൂയിസർ പ്രാഡോ ഇന്ത്യയിലേക്കെത്തുന്നു

രാജ്യത്തെ വാഹനവ പ്രേമികൾ ഏറെ നാളായി കാത്തിരിക്കുന്ന ഓഫ് റോഡ് വാഹനമാണ് ടൊയോട്ട ലാൻഡ് ക്രൂയിസർ പ്രാഡോ. ആ കാത്തിരിപ്പിന് വിരാമം കുറിക്കാൻ സമയമായെന്നാണ് റിപ്പോർട്ടുകൾ. ഇന്ത്യൻ വാഹന വിപണിയിലേക്ക് പ്രാഡോയെ എത്തിക്കാൻ നീക്കങ്ങൾ നടക്കുന്നുവെന്നാണ് റിപ്പോർട്ടുകൾ. വാഹനം വിപണിയിലെത്താൻ 2025 അവസാനം വരെ കാത്തിരിക്കണം. പൂർണമായി വിദേശത്ത് നിർമിച്ച് ഇന്ത്യയിലേക്ക് ഇറക്കുമതി ചെയ്യാനാണ് ടൊയോട്ട പദ്ധതിയിടുന്നത്.

ഇന്ത്യയിലെ ലോഞ്ചിനോട് അടുക്കുമ്പോഴേ കൂടുതൽ വിവരങ്ങൾ കമ്പനി പുറത്തുവിടുകയുള്ളൂ. വാഹനം ഇന്ത്യയിലെത്താൻ അടുത്ത വർഷം ആകുമെങ്കിലും ആ​ഗോള വിപണിയിൽ കഴിഞ്ഞ വർ‌ഷം മുതൽ പ്രാഡോ ഇടം പിടിച്ചിരുന്നു. റെട്രോ ബോക്സി ഡിസൈനിലാണ് കമ്പനി വാഹനത്തെ അവതരിപ്പിച്ചത്. ഏത് ഭൂപ്രദേശത്തും അനായാസ യാത്രയാണ് പ്രാഡോ വാ​ഗ്ദാനം ചെയ്യുന്നത്. ഇതിനായി മെച്ചപ്പെടുത്തിയ ഓൾ ടെറയിൻ സംവിധാനമാണ് വാഹനത്തിൽ സജ്ജമാക്കിയിരിക്കുന്നത്.

കൂടുതൽ ഫീച്ചറുകളും സാങ്കേതിക വി​ദ്യയും ഉൾക്കൊള്ളിച്ചുകൊണ്ടുള്ള ഏറ്റവും പുതിയ ക്യാബിനാണ് പുതിയ പ്രാഡോയിലുള്ളത്. 12.3 ഇഞ്ച് ഇൻഫോടെയ്ൻമെന്റ് സിസ്റ്റം, ഇലക്ട്രിക് സൺറൂഫ്, ഹീറ്റഡ് ആൻഡ് വെന്റിലേറ്റഡ് സീറ്റുകൾ, ഹെഡ് അപ് ഡിസ്പ്ലേ, വയർലെസ് ചാർജർ തുടങ്ങിയവ വാഹനത്തിലുണ്ട്. പുതിയ ലാൻഡ് ക്രൂയിസർ പ്രാഡോ, വർധിച്ച വീൽ ആർട്ടിക്യുലേഷൻ, നവീകരിച്ച മൾട്ടി-ടെറൈൻ മോണിറ്റർ ഇൻ്റർഫേസ്, ഓഫ്-റോഡ് ഡ്രൈവിംഗ് മോഡുകളുടെ മെച്ചപ്പെടുത്തലുകൾ എന്നിവ ഉൾക്കൊള്ളുന്ന മെച്ചപ്പെടുത്തിയ ഓൾ-ടെറൈൻ ശേഷി വാഗ്ദാനം ചെയ്യുന്നതായി ടൊയോട്ട പറയുന്നു.

LC300 പോലെ തന്നെ പുതിയ ലാൻഡ് ക്രൂയിസർ പ്രാഡോയും ഇന്ത്യയിൽ ഒരു CBU ആയി അവതരിപ്പിക്കും. 48വി എംഎച്ച്ഇവി മൈൽഡ് ഹൈബ്രിഡ് സിസ്റ്റമുള്ള 2.8 ലിറ്റർ ഓട്ടോമാറ്റിക് ഡീസൽ എഞ്ചിനാണ് പ്രാഡോയിലുള്ളത്. 8സ്പീഡ് ഓട്ടോമാറ്റിക് ട്രാൻസ്മിഷനോടുകൂടിയ 2.4 ലിറ്റർ പെട്രോൾ ഹൈബ്രിഡ് എഞ്ചിനും വാഹനത്തിലുണ്ട്.

Story Highlights : Toyota Land Cruiser Prado India launch by late 2025