‘രാജ്യത്തിന്റെ ആത്മാഭിമാനവും മനോവീര്യവും വർദ്ധിപ്പിച്ചു’, പാകിസ്താനിനുള്ളിൽ ആക്രമണം അനിവാര്യം; സൈന്യത്തെ അഭിനന്ദിച്ച് ആർ‌എസ്‌എസ് മേധാവി

ഓപ്പറേഷൻ സിന്ദൂരിനെ പ്രശംസിച്ച് ആർ‌എസ്‌എസ് മേധാവി മോഹൻ ഭാഗവത്. ‘രാജ്യത്തിന്റെ ആത്മാഭിമാനവും മനോവീര്യവും വർദ്ധിപ്പിച്ചു’ എന്ന് അദ്ദേഹം പറഞ്ഞു. ഇന്ത്യയുടെ സുരക്ഷയ്ക്ക് പാകിസ്താനിനുള്ളിലെ ആക്രമണങ്ങൾ അനിവാര്യമാണെന്ന് അദ്ദേഹം പറഞ്ഞു. ദി ഇന്ത്യൻ എക്‌സ്പ്രസ് ഉൾപ്പെടെയുള്ള ദേശീയ മാധ്യമങ്ങളാണ് വാർത്ത റിപ്പോർട്ട് ചെയ്യുന്നത്.

“പഹൽഗാമിൽ നിരായുധരായ വിനോദസഞ്ചാരികൾക്ക് നേരെയുണ്ടായ ഭീരുത്വപരമായ ആക്രമണത്തെത്തുടർന്ന് പാക് സ്പോൺസർ ചെയ്ത തീവ്രവാദികൾക്കും അവരെ പിന്തുണയ്ക്കുന്ന ആവാസവ്യവസ്ഥയ്ക്കുമെതിരെ സ്വീകരിച്ച ‘ഓപ്പറേഷൻ സിന്ദൂർ’ എന്ന നിർണായക നടപടിക്ക് കേന്ദ്ര സർക്കാർ നേതൃത്വത്തെയും സായുധ സേനയെയും ഞങ്ങൾ അഭിനന്ദിക്കുന്നു.

വിനോദസഞ്ചാരികളെ ക്രൂരമായി കൂട്ടക്കൊല ചെയ്തതിൽ ദുരിതമനുഭവിക്കുന്ന കുടുംബങ്ങൾക്കും മുഴുവൻ രാജ്യത്തിനും നീതി ഉറപ്പാക്കാനുള്ള ഈ നടപടി മുഴുവൻ രാജ്യത്തിന്റെയും ആത്മാഭിമാനവും മനോവീര്യവും വർദ്ധിപ്പിച്ചു,” സംഘടന പുറത്തിറക്കിയ ഔദ്യോഗിക പ്രസ്താവനയിൽ മോഹൻ ഭാഗവത് പറഞ്ഞു.

“രാജ്യത്തിന്റെ സുരക്ഷയ്ക്ക് പാക് ഭീകരർക്കും അവരുടെ അടിസ്ഥാന സൗകര്യങ്ങൾക്കുമെതിരെ സൈനിക നടപടി സ്വീകരിക്കേണ്ടത് അനിവാര്യമാണ്. ഞങ്ങൾ പൂർണ്ണമായും സമ്മതിക്കുന്നു. ദേശീയ പ്രതിസന്ധിയുടെ ഈ മണിക്കൂറിൽ, രാജ്യം മുഴുവൻ സർക്കാരിനോടും സായുധ സേനയോടും ഒപ്പം ഉറച്ചുനിൽക്കുന്നു,” അദ്ദേഹം പറഞ്ഞു.

ഇന്ത്യൻ അതിർത്തിയിലെ പ്രദേശങ്ങളിൽ പാക് സൈന്യം നടത്തുന്ന ആക്രമണങ്ങൾ ക്രൂരവും മനുഷ്യത്വരഹിതവുമാണ്. ആക്രമണങ്ങളിൽ ഇരകളായവരുടെ കുടുംബങ്ങൾക്ക് അനുശോചനം രേഖപ്പെടുതുന്നുവെന്നും അദ്ദേഹം പറഞ്ഞു.

സർക്കാരിന്റെ നിർദ്ദേശങ്ങൾ പാലിക്കണമെന്ന് അദ്ദേഹം അഭ്യർത്ഥിച്ചു. നമ്മുടെ പൗരധർമ്മം നിർവഹിക്കുമ്പോൾ ജാഗ്രത പാലിക്കണം, സാമൂഹിക ഐക്യം തകർക്കുന്നതിൽ ദേശവിരുദ്ധ ശക്തികളുടെ ഒരു ഗൂഢാലോചനയും വിജയിക്കാൻ അനുവദിക്കരുതെന്നും അദ്ദേഹം പറഞ്ഞു.

Story Highlights : mohan bhagwat parises operation sindoor