മാറാൻ സമയമായി, ബാക്ക് ബെഞ്ചേഴ്സ് സങ്കൽപ്പം ഒഴിവാക്കും,’U’ ഷേപ്പിലേക്ക് മാറ്റാൻ ആലോചന; വിദ്യാഭ്യാസ വകുപ്പ്
കേരളത്തിലെ വിദ്യാഭ്യാസ മേഖലയിൽ സമൂലമായ മാറ്റങ്ങൾക്ക് ഒരുങ്ങി വിദ്യാഭ്യാസ വകുപ്പ്. വിദ്യാർത്ഥികളുടെ പഠനരീതി, ക്ലാസ് മുറികളിലെ അന്തരീക്ഷം, മൊബൈൽ ഫോൺ ഉപയോഗം തുടങ്ങിയ വിഷയങ്ങളിൽ പുതിയ പരിഷ്കാരങ്ങൾ കൊണ്ടുവരുമെന്ന് വിദ്യാഭ്യാസ മന്ത്രി വി. ശിവൻകുട്ടി അറിയിച്ചു.
[concept of backbenchers will be eliminated, plans to change to a ‘U’ shape]
ക്ലാസ് മുറികളിലെ പരമ്പരാഗതമായ ഇരിപ്പിട രീതി മാറ്റുന്നതിനെക്കുറിച്ചാണ് ഒരു പ്രധാന നിർദ്ദേശം. നിരയായി അടുക്കിയിടുന്ന ബെഞ്ചുകൾക്ക് പകരം, ക്ലാസുകൾ ‘യൂ’ ഷേപ്പിലേക്ക് മാറ്റാൻ സർക്കാർ ആലോചിക്കുന്നു. ‘ബാക്ക് ബെഞ്ചേഴ്സ്’ എന്ന സങ്കൽപം പലപ്പോഴും വിദ്യാർത്ഥികളുടെ ആത്മവിശ്വാസത്തെയും പഠനത്തെയും പ്രതികൂലമായി ബാധിക്കുന്നതായി മന്ത്രി ചൂണ്ടിക്കാട്ടി. പിൻബെഞ്ചിലിരിക്കുന്ന വിദ്യാർത്ഥികൾക്ക് അധ്യാപകരുമായി നേരിട്ട് സംവദിക്കാനുള്ള അവസരം കുറവായിരിക്കും.
പുതിയ ‘യൂ’ ഷേപ്പ് സംവിധാനം എല്ലാ വിദ്യാർത്ഥികളെയും ക്ലാസ് ചർച്ചകളിൽ സജീവമായി പങ്കെടുക്കാൻ പ്രേരിപ്പിക്കും. ഇത് വിദ്യാർത്ഥികളും അധ്യാപകരും തമ്മിലുള്ള ആശയവിനിമയം മെച്ചപ്പെടുത്താനും, കൂടുതൽ ഊർജ്ജസ്വലമായ ഒരു പഠനാന്തരീക്ഷം സൃഷ്ടിക്കാനും സഹായിക്കും. എല്ലാ വിദ്യാർത്ഥികൾക്കും തുല്യമായ പരിഗണന ലഭിക്കുന്നുണ്ടെന്ന് ഉറപ്പാക്കാനും ഈ മാറ്റം സഹായകമാകും. വിദഗ്ദ്ധ സമിതിയുടെ റിപ്പോർട്ടിന് ശേഷം ഈ വിഷയത്തിൽ സർക്കാർ അന്തിമ തീരുമാനമെടുക്കും.
ക്ലാസ് മുറികളിലെ മാറ്റങ്ങൾക്കൊപ്പം, വിദ്യാർത്ഥികളുടെ മൊബൈൽ ഫോൺ ഉപയോഗം സംബന്ധിച്ചും സർക്കാർ ഗൗരവമായി ചിന്തിക്കുന്നുണ്ട്. സ്കൂളുകളിൽ കുട്ടികളുടെ മൊബൈൽ ഫോൺ ഉപയോഗം നിയന്ത്രിക്കുന്നത് സംബന്ധിച്ച് വിപുലമായ ഒരു ചർച്ച നടത്തേണ്ടത് ആവശ്യമാണെന്ന് മന്ത്രി പറഞ്ഞു.
മൊബൈൽ ഫോൺ ലഭിക്കാത്തതിൻ്റെ പേരിൽ കുട്ടികളിൽ ആത്മഹത്യാ പ്രവണത വർധിക്കുന്നുണ്ടെന്ന് മന്ത്രി ചൂണ്ടിക്കാട്ടി. കുട്ടികളുടെ ആത്മഹത്യകളിൽ ഏകദേശം 50 ശതമാനവും മൊബൈൽ ഫോൺ ലഭിക്കാത്തതുമായി ബന്ധപ്പെട്ടതാണെന്ന് അദ്ദേഹം വ്യക്തമാക്കി. ഈ വിഷയത്തിൻ്റെ ഗൗരവം കണക്കിലെടുത്ത്, കുട്ടികളുടെ മാനസികാരോഗ്യത്തെയും പഠനത്തെയും സംരക്ഷിക്കുന്ന തരത്തിലുള്ള ഒരു നയം രൂപീകരിക്കാൻ സമൂഹത്തിൻ്റെ എല്ലാ കോണുകളിൽ നിന്നും അഭിപ്രായങ്ങൾ തേടേണ്ടത് അത്യാവശ്യമാണെന്നും മന്ത്രി കൂട്ടിച്ചേർത്തു.
ഈ പുതിയ പരിഷ്കാരങ്ങളിലൂടെ, കൂടുതൽ ആധുനികവും, വിദ്യാർത്ഥി സൗഹൃദപരവുമായ ഒരു വിദ്യാഭ്യാസ അന്തരീക്ഷം സൃഷ്ടിക്കാനാണ് വിദ്യാഭ്യാസ വകുപ്പ് ശ്രമിക്കുന്നത്. ഈ മാറ്റങ്ങൾ ലക്ഷ്യമിട്ടുള്ള സർക്കാർ തീരുമാനത്തിന് പിന്നിൽ 2024-ൽ പുറത്തിറങ്ങിയ ‘സ്ഥാനാർഥി ശ്രീക്കുട്ടൻ’ എന്ന സിനിമയുടെ സ്വാധീനമുണ്ടെന്ന് തന്നെ പറയാം. വിനേഷ് വിശ്വന്ത് സംവിധാനം ചെയ്ത ചിത്രം പരമ്പരാഗതമായ ക്ലാസ് മുറി പഠനരീതികളെയും, ‘ബാക്ക് ബെഞ്ചേഴ്സ്’ എന്ന സങ്കൽപ്പത്തെയും ചോദ്യം ചെയ്തിരുന്നു. സിനിമയുടെ ക്ലൈമാക്സിൽ ക്ലാസ് മുറികൾ ‘യൂ’ ഷേപ്പിലേക്ക് മാറ്റുന്ന ആശയം വലിയ ചർച്ചകൾക്ക് വഴിയൊരുക്കി. ഇപ്പോൾ കേരള സർക്കാരും ഈ ആശയത്തെ ഏറ്റെടുക്കാൻ ഒരുങ്ങുകയാണ്.
Story Highlights : It’s time for a change, the concept of backbenchers will be eliminated, plans to change to a ‘U’ shape; Education Department
ട്വന്റിഫോർ ന്യൂസ്.കോം വാർത്തകൾ ഇപ്പോൾ വാട്സാപ്പ് വഴിയും ലഭ്യമാണ് Click Here
