‘രാഹുലിന് പറയാനുള്ളത് കൂടി കേൾക്കും; പരാതികളിൽ വിട്ടുവീഴ്ചയില്ലാത്ത നടപടിയെടുക്കും’, വി ഡി സതീശൻ

രാഹുൽ മാങ്കൂട്ടത്തിൽ എംഎൽഎയ്ക്കെതിരായ പരാതികളിൽ വിട്ടുവീഴ്ചയില്ലാത്ത നടപടിയെടുക്കുമെന്ന് പ്രതിപക്ഷ നേതാവ് വി ഡി സതീശൻ. രാഹുലിന് പറയാനുള്ളത് കൂടി കേൾക്കും. നിരപരാധി ആണെങ്കിൽ അത് തെളിയിക്കാനുള്ള അവസരം കൊടുക്കും. നടപടി ഉണ്ടാകുമെന്ന് താൻ പറഞ്ഞതാണ്. ആരോപണവിധേയനായ വ്യക്തിക്ക് പറയാനുള്ളത് കൂടി കേൾക്കുമെന്ന് നേരെത്തെ നടന്ന പത്രസമ്മേളനത്തിൽ പറഞ്ഞിരുന്നു, വി ഡി സതീശൻ പറഞ്ഞു.

രാഹുൽ വിഷയത്തിൽ കോൺഗ്രസ്‌ കൃത്യമായിട്ടാണ് ഇടപെട്ടത്. പരാതി ലഭിച്ച് 24 മണിക്കൂറിനുള്ളിൽ രാഹുൽ രാജിവെച്ചു. സിപിഐഎമ്മിനോ ബിജെപിക്കോ ഈ വിഷയത്തിൽ നാവ് അനക്കാൻ അവകാശമില്ല. ഒന്നല്ല ഒരുപാടുണ്ടാലോ, കോഴിയെ ഉപയോഗിച്ച് മാർച്ച് നടത്തുന്നവർ കോഴിഫാം നടത്തുന്നവരാണ്. ഒരു വിരൽ ഞങ്ങൾക്ക് നേരെ ചൂണ്ടുമ്പോൾ ബാക്കി കൈയ്യിലെ വിരൽ സ്വന്തം നെഞ്ചിലേക്കാണ് ചൂണ്ടുന്നതെന്ന് മനസ്സിലാക്കണം.

പരാതിക്കാരായ സ്ത്രീകളെ അധിക്ഷേപിച്ചുകൊണ്ടുള്ള വി കെ ശ്രീകണ്ഠന്റെ പ്രസ്താവന അറിഞ്ഞ് അപ്പോൾ തന്നെ അദ്ദേഹത്തെ ഫോണിൽ വിളിച്ച് പ്രതിഷേധം രേഖപ്പെടുത്തിയിരുന്നു. പിന്നാലെ അദ്ദേഹം അത് തിരുത്തുകയും ചെയ്തു. ശ്രീകണ്ഠൻ പറഞ്ഞത് പൊളിറ്റിക്കലി ഇൻകറക്ട് ആയിട്ടുള്ള കാര്യങ്ങളാണ്. ഒരു കാരണവശാലും അത്തരം കാര്യങ്ങളെ കോൺഗ്രസ് പ്രോത്സാഹിപ്പിക്കില്ലെന്ന് വി ഡി സതീശൻ പറഞ്ഞു.

Story Highlights : VD Satheesan reacts Rahul mamkootathil issue