ആശുപത്രിയിൽ ഓക്‌സിജനില്ല; 5 ദിവസത്തിനിടെ മരിച്ചത് 60 കുട്ടികൾ

ആശുപത്രിയിലുണ്ടായ ഓക്‌സിജൻ ക്ഷാമത്തെ തുടർന്ന് ശ്വാസം കിട്ടാതെ അഞ്ച് ദിവസത്തിനുള്ളിൽ മരിച്ചത് 60 കുട്ടികൾ. ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ മണ്ഡലമായ ഗോരഖ്പൂരിലെ മെഡിക്കൽ കോളജ് ആശുപത്രിയിലാണ് സംഭവം. ഓക്‌സിജൻ കമ്പനി വിതരണം നിർത്തിയതിനെത്തുടർന്ന് ഓക്‌സിജൻ ക്ഷാമമുണ്ടായതാണ് വലിയ ദുരന്തത്തിലേക്കു നയിച്ചത്.

ആശുപത്രിയിലെ പുതിയ ഐ.സി.യു ഉദ്ഘാടനം ചെയ്യാൻ വേണ്ടി രണ്ടു ദിവസം മുമ്പ് യോഗി ആശുപത്രി സന്ദർശിച്ചിരുന്നു. അന്നേ ദിവസം മാത്രം ഒൻപത് കുട്ടികൾ മരിച്ചുവെന്നാണ് കണക്ക്.

എന്നാൽ ഓക്‌സിജൻ ഇല്ലാത്തതു കാരണമല്ല കുട്ടികളുടെ മരണമെന്നാണ് സർക്കാർ വാദം. സംഭവം പുറത്തുവന്നയുടനെ സർക്കാർ മജിസ്‌ട്രേറ്റ് തല അന്വേഷണം പ്രഖ്യാപിച്ചിരുന്നു. ഓക്‌സിജൻ വിതരണത്തിന്റെ അഭാവം മൂലം ഒരു ശിശുമരണവും നടന്നിട്ടില്ലെന്ന് ജില്ലാ മജിസ്‌ട്രേറ്റ് രാജീവ് റൗട്ടേല പറഞ്ഞു.

ഓക്‌സിജൻ വിതരണ കമ്പനിക്ക് പണം നൽകാനുണ്ടെന്ന കാര്യം അന്വേഷിക്കേണ്ടതാണെന്നും അദ്ദേഹം പറഞ്ഞു. എന്നാൽ ആശുപത്രി ആവശ്യങ്ങൾക്കായി 50 ഓക്‌സിജൻ സിലിണ്ടറുകൾ ഉണ്ടെന്നും അദ്ദേഹം പറഞ്ഞു.

no oxygen cylinder in hospital 60 children dead within 5 days