ആക്രമിക്കപ്പെട്ട നടിയ്ക്ക് ഓണക്കോടിയുമായി വനിതകൾ

ആക്രമിക്കപ്പെട്ട നടിയ്ക്ക് ഓണക്കോടിയുമായെത്തി ഐക്യദാർഢ്യം പ്രഖ്യാപിച്ച് വനിതാ സംഘം. നടിയുടെ വീട്ടിലെത്തിയാണ് അവർ ഓണക്കോടി സമ്മാനിച്ചത്. പ്രഫൊസർ സാറാ ജോസഫ് അടക്കമുള്ള വിങ്‌സ് സംഘടനയുടെ നേതൃത്വത്തിലായിരുന്നു സന്ദർശനം.

നടിയെ ആക്രമിച്ച കേസിൽ പ്രതിയായി വിചാരണ തടവിൽ കഴിയുന്ന ദിലീപിന് നടൻമാർ ആലുവ സബ്ജയിലിലെത്തി ഓണക്കോടി നൽകി ഐക്യദാർഢ്യം പ്രഖ്യാപിച്ചിരുന്നു. ഈ സാഹചര്യത്തിലാണ് നടിയ്‌ക്കൊപ്പമെന്ന പ്രഖ്യാപനവുമായി വനിതാ സംഘടനകൾ രംഗത്തെത്തിയത്.

ആക്രമിക്കപ്പെട്ട സംഭവം തുറന്ന് പറയുകയും സമ്മർദ്ദങ്ങൾ ഉണ്ടായിട്ടും പരാതിയിൽ ഉറച്ച് നിൽക്കുകയും ചെയ്തത് സ്ത്രീ സമൂഹത്തിന് പ്രചോദനം നൽകുന്നതാണെന്ന് ഓണക്കോടി നൽകിയതിന് ശേഷം സാറാ ജോസഫ് പറഞ്ഞു.