ബാബരി മസ്ജിദ് കേസ്; പ്രധാന കേസിൽ അന്തിമവാദം ഇന്ന് തുടങ്ങും

അയോധ്യയിൽ ബാബരി മസ്ജിദ് നിലനിന്നിരുന്ന ഭൂമിയുടെ ഉടമസ്ഥാവകാശം സംബന്ധിച്ച കേസിൽ അന്തിമവാദം ഇന്നു തുടങ്ങും. പള്ളി തകർത്തതിന്റെ 25ാംവാർഷികം നാളെ ആചരിക്കാനിരിക്കുകയും പള്ളിനിലനിന്ന സ്ഥലത്ത് രാമക്ഷേത്രം നിർമിക്കാനുള്ള നീക്കങ്ങൾ ആർ.എസ്.എസ് കേന്ദ്രങ്ങൾ സജീവമാക്കുകയും ചെയ്ത സാഹചര്യത്തിലാണ് സുപ്രിം കോടതി ചീഫ്ജസ്റ്റിസ് ദീപക് മിശ്ര അധ്യക്ഷനായ മൂന്നംഗ ബെഞ്ച് ഇന്നു കേസ് പരിഗണനക്കെടുക്കുക.

അയോധ്യയിൽ പള്ളി നിലനിന്ന ഭൂമി മൂന്നായി വീതിച്ചുകൊണ്ടുള്ള 2010 മെയിലെ അലഹബാദ് ഹൈക്കോടതി ലഖ്‌നൗ ബെഞ്ചിന്റെ വിധിയ്‌ക്കെതിരായ ഹരജിയാണ് ഉടമസ്ഥാവകാശവുമായി ബന്ധപ്പെട്ട കേസായി കോടതിയുടെ പരിഗണനയിലുള്ളത്.