ഓഖി; കാണാതായവർക്കായുള്ള തെരച്ചിൽ ഊർജിതമാക്കി

ഓഖി ചുഴലിക്കാറ്റിൽപ്പെട്ട് കടലിൽ കാണാതായവർക്കായുള്ള തെരച്ചിൽ ഊർജിതമാക്കി. മുഖ്യമന്ത്രി ആവശ്യപ്പെട്ടതനുസരിച്ച് കൊല്ലം, എറണാകുളം, കോഴിക്കോട് ജില്ലകളിൽ നിന്നുള്ള 71 ബോട്ടുകൾ തെരച്ചിലിന് പുറപ്പെട്ടു.

അപകടത്തിൽപ്പെട്ടവരെ കണ്ടെത്താൻ ആവാത്തതിനെതിരെ പ്രതിഷേധമുയർന്നതിനു പിന്നാലെ തെരച്ചിലിന് മുഖ്യമന്ത്രി മത്സ്യ തൊഴിലാളികളുടെ സഹായം തേടിയിരുന്നു. ഇതിന് സന്നദ്ധത അറിയിച്ച 200 ബോട്ടുകളിൽ 71 എണ്ണമാണ് അർദ്ധരാത്രിയോടെ യാത്ര പുറപ്പെട്ടത്. 25 ബോട്ടുകൾ കൊല്ലത്ത് നിന്നും 22 എണ്ണം കോഴിക്കോട് നിന്ന് 24 ബോട്ടുകൾ കൊച്ചിയിൽ നിന്നുമാണ് യാത്ര തിരിച്ചത്. ഓരോ ബോട്ടിലും അഞ്ച് വീതം മത്സ്യതൊഴിലാളികളാണ് ഉള്ളത്. കടലിൽ വിവിധ ഭാഗങ്ങളിലായി ഇവർ തെരച്ചിൽ നടത്തും.