മധുവിന്റെ പോസ്റ്റുമോര്‍ട്ടം നടപടികള്‍ ആരംഭിച്ചു

അട്ടപ്പാടിയിൽ നാട്ടുകാര്‍ മര്‍ദ്ദിച്ച് കൊലപ്പെടുത്തിയ  മധുവിന്റെ പോസ്റ്റ്മോര്‍ട്ടം  നടപടികള്‍ ആരംഭിച്ചു.  തൃശൂര്‍ മെഡിക്കൽ കോളേജിലാണ് പോസ്റ്റുമോര്‍ട്ടം നടക്കുന്നത്. അതേസമയം മധുവിനെ മർദ്ദിച്ച് കൊന്നതിൽ പ്രതിഷേധിച്ച് മണ്ണാർക്കാട് നിയോജകമണ്ഡലത്തിൽ ഇന്ന് ബിജെപി ഹർത്താൽ ആചരിക്കുകയാണ്. മണ്ണാർക്കാട് താലൂക്കിൽ യുഡിഎഫും ഹർത്താലിന് ആഹ്വാനം ചെയ്തിട്ടുണ്ട്.

മധുവിന്റെ കുടുംബത്തെ കാണാൻ മന്ത്രി എ.കെ.ബാലൻ, പ്രതിപക്ഷ നേതാവ് രമേശ് ചെന്നിത്തല, വി.എം.സുധീരൻ തുടങ്ങിയവർ ഇന്ന് അട്ടപ്പാടിയിലെത്തും. ആരോഗ്യ മന്ത്രി ശൈലജ ടീച്ചര്‍ തൃശ്ശൂര്‍ മെഡിക്കല്‍ കോളേജില്‍ എത്തിയിട്ടുണ്ട്. ഡോ എന്‍എ ബലറാമിന്റെ നേതൃത്വത്തിലാണ് പോസ്റ്റുമോര്‍ട്ടം നടക്കുന്നത്.